Dílipost.com Maliana, 4 Fevereiru 2026 – Prezidénsia Repúblika, liu husi Unidade Sosiedade Sivíl no Assuntu Sosiál, entrega kulsaun, sumasu no fronhas ba dormitóriu feminina Orfanatu Uma Esperansa, ne’ebé lokaliza iha Aldeia Oplegul, Suku Holsa, Postu Administrativu Maliana.
Apoiu ne’e mai husi orientasaun direta husi Prezidente Repúblika (PR), José Ramos-Horta, hafoin nia halo vizita ba orfanatu refere iha semana anterior. Iha vizita ne’e, madre SSPS sira hato’o situasaun labarik sira ne’ebé seida’uk iha kulsaun no sumasu ne’ebé adekuadu ba sira nia toba.
Asesor Prezidénsia Repúblika, Quintiliano Moniz, hateten katak apoiu ida-ne’e la’os primeira-vez Prezidénsia Repúblika fó apoiu ba Orfanatu Uma Esperansa. Antes ne’e, Prezidénsia Repúblika mós halo ona konstrusaun uma ho sala han fatin, no entrega mákina postura (suku-hena) ba orfanatu refere.
“Apoiu ne’e mai husi Prezidente Ramos-Horta nia konxiénsia rasik. La’os de’it ba Uma Esperansa, maibé mós ba orfanatu sira seluk iha munisípiu sira. Prezidente fó prioridade ba labarik sira no família sira ne’ebé vulnerável. Tinan ida-ne’e, Prezidente mós tau prioridade ba Orfanatu Uma Esperansa ida iha Munisípiu Baucau, tanba iha labarik balun mak toba de’it iha rai. Ne’e atu kompleta servisu sosiál Governu nian,” hateten Asesor Quintiliano Moniz iha nia entrevista ho jornalista iha Maliana.
Responsável Orfanatu Uma Esperansa, Madre Aurelia Rosa da Costa, husi Kongregasaun Servas do Espírito Santo (SSpS), hato’o agradesimentu ba Prezidénsia Repúblika ba apoiu ne’ebé fó ona.
“Hodi labarik sira nia naran, ami hato’o agradesimentu profundu ba Prezidente Ramos-Horta ne’ebé ho laran-luak fó ona resposta ba ami nia pedidu ne’ebé ami hatama iha semana anterior. Ohin ekipa Prezidénsia bele tuun direta hodi lori materiál no ekipamentu ne’ebé ami husu,” hateten Madre Aurelia.
Iha serimónia simbólika entrega sasan, Sekretáriu Autoridade Munisípiu Bobonaro ba Asuntu Administrasaun no Finansas, Domingos da Costa, partisipa no hato’o mós nia agradesimentu ba Prezidénsia Repúblika.
Nia husu atu apoiu hanesan ne’e bele estende ba orfanatu sira seluk iha postu administrativu sira iha Munisípiu Bobonaro.
Sasan ne’ebé orfanatu simu mak kulsaun no sumasu hamutuk 40, no mós kolxa kama. Madre sira mós hato’o pedidu ba apoiu tan hanesan komputadór no mobiliáriu (meja no kadeira), atu bele loke kursu edukativu kona-ba informátika. Tuir planu tinan 2026, Orfanatu Uma Esperansa sei loke mós kursu lian Português no Inglês ba labarik sira.
Agora dadaun, Orfanatu Uma Esperansa simu labarik 20, ne’ebé maioria mai husi família kbiit natoon no enfrenta problema sosiál hanesan divórsiu inan-aman, trauma psikológiku no inan-aman destiñu.
Jornalísta : Azacsi Quintão
