DiliPost.com- Hafoin to’o iha Vatikanu Roma, Kinta feira (24 /04) ne’e Ministru Negósiu Estranjeiru no Kooperasaun, Bendito dos Santos Freitas, ho delegasaun no Embaixadora Timor-Leste ba Santa Sé, Cloe Tilman Dindo, kontinua kedas ba presta omenajen ba maktoban Sua Santidade Papa Francisco iha Bazílika Saun Pedro.
“Ha’u to’o iha Roma, ha’u kumpre ha’u-nia devér hodi reprezenta Governu Timor-Leste hodi fó omenajen ba Sua Santidade Papa Francisco, iha Bazílika Saun Pedro, Vatikanu, ho ekipa husi Embaixada Timor-Leste ba Santa Sé,” hatete Ministru Bendito.
Papa Francisco nia isin deskansa iha kaixaun simples ida, halo ho ai no zinku, ne’ebé Pontífise Francisco hili, nu’udar símbolu haraik-an nian ne’ebé marka tinan 12 ninia Pontifikadu nian.
Entretantu, iha reuniaun Konsellu Ministru extraordináriu tersa-feira foin lalais ne’e, Governu delega Ministru Negósiu Estranjeiru no Kooperasaun, Bendito dos Freitas, atu reprezenta Governu hodi partisipa iha serimónia funerál Santu Padre Francisco nian iha Vatikanu, Roma.
Papa Francisco hakotu iss iha loron Segunda-feira, 21 Abríl foin lalais ne’e iha nia rezidénsia Casa Santa Marta.
Tuir oráriu, maktoban Papa Francisco nia isin mate sei halo iha loron Sábdu, 26 Abríl 2025.
Papa Francisco nia mate-isin transfere ona hosi nia rezidénsia iha Casa Santa Marta ba Bazílika Saun Pedro nian, iha ne’ebé restu mortais sira hosi Pontífise, ne’ebé mate iha loron-segunda Páskua nian, sei fó onra hosi sarani sira antes misa funerál, ne’ebé marka ona ba loron-sábadu, 26 Abril.
Ema rihun ruanulu simu Papa Francisco nia mate-isin ho basa-liman naruk. Prosesaun to’o iha interiór Bazílika nian no, iha Altár Konfisaun nia oin, kaixaun ne’ebé iha Amu-Papa nia mate-isin tau iha baze ai simples ida.
Iha Sexta-feira, 25 Abril, iha tuku 8:00 kalan. oras lokál, sei iha serimónia taka kaixaun Fransisku nian iha Bazílika São Pedro. Ritu ne’e sei prezide hosi Kardeál Kevin Joseph Farrell, Camerlengo hosi Igreja Santa Romana.
Hanesan fó sai husi Gabinete ba Selebrasaun Litúrjika Pontifísia, sei marka prezensa tuirmai ne’e: Kardeál sira Giovanni Battista Re, Dekanu Koléjiu Kardeál sira-nian; Roger Michael Mahony, Padre Kardeál; Dominique Mamberti, Kardeál Protodiákonu; no Mauro Gambetti, Amu-Padre Bazílika Papal Saun Pedro nian iha Vatikanu.
Marka prezensa mós kardeál sira Pietro Parolin, eis-Sekretáriu Estadu; Baldassare Reina, Vigáriu Jerál ba Dioseze Roma nian; Konrad Krajewski, Almoner ba Sua Santidade; aleinde ne’e, Amu-Bispu Edgar Peña Parra, substitutu Sekretaria Estadu nian, Amu-Bispu Ilson de Jesus Montanari, vise-kamerlengu Santa Igreja Romana, Amu-Bispu Leonardo Sapienza, rejente Uma-kain Papal nian, kánon sira Kapítulu Vatikanu nian, penitensiáriu menór ordináriu sira hosi Vatikanu, Padre sira ne’ebé autorizadu ho autorizasaun sira seluk husi mestre Selebrasaun Litúrjika Pontifísia nian, Amu-Bispu Diego Ravelli.
Jornalista : Azacsi Quintão
