DiliPost.com – Primeiru Ministru (PM), Kay Rala Xanana Gusmão konsidera sua Santidade Papa Francisco nu’udár figura ezemplár kona-bá fiar, rekonsiliasaun no dame iha Igreja nia laran no mós iha mundu.
Tan ne’e, PM triste tebes ho falesimentu Sua Santidade Papa Francisco nian no husu atu povu Timor-Leste (TL) atu reza bá Santu Papa nia klamar atu hetan fatin di’ak iha Nai Maromak Nia Kadunan Santu.
“Sua Santidade Papa Francisco nu’udár figura ida di’ak-liu iha mundu tanba korazen hodi asina dokumentu Fraternidade Umana no Papa ida ne’ebé hakilar maka’as iha mundu hodi bolu atensaun bá líder mundiál sira ne’ebé halo funu hodi rezulta labarik no povu baibain sofre no mate. Papa Francisco mós hanorin sarani sira atu haree ema kbiit la’ek sira. Papa sai ezemplu ida iha Igreja nia laran tanba envés halo de’it misa, atende sosiedade ninia presiza iha morál, polítika no iha buat oioin. Ne’ebé Papa Francisco sai figura di’ak tebtebes bá mundu,” dehan xefi Govenu ne’e iha Aeroportu Internasionál Prezidente Nicolau Lobato, Comoro, Kinta feira (24/04) ohin.
Kay Rala Xanana Gusmão rasik hetan kontaktu via telefónika hosi Prezidente Repúblika (PR), José Ramos-Horta bainhira sei iha hela Melbourne Austrália, hodi fó hatene no Xefe Governu rasik kontaktu kedan mai Dili hodi Konsellu Ministru hasai rezolusaun bá lutu nasionál durante loron hitu ho hasa’e bandeira meia hasta.
Xefe Governu mós akompaña dreta kona-bá serimónia ne’ebé hala’o iha Bazílika São Pedro nian liu-hosi média internasionál sira.
Xanana Gusmão relemba katak, foin lalais Papa Francisco mai vizita Timor-Leste, halo mundu tomak admira tanba sarani 700.000 nakonu iha Tasi-tolu, tanba Papa ema di’ak liu ne’e maka atrai sarani barak to’o fatin mak la to’o.
Xefe Governu hatutan, durante iha Timor mós Sua Santidade Papa Farncisco hasoru-malu ho komunidade Muslumanu sira no joven sira hodi husik hela mensajen esperansa bá Timor oan hotu-hotu.
Aliende ne’e PM husu bá povu tomak atu hasa’e orasaun bá Maromak hodi haraik fatin di’ak bá Papa Francisco nia klamar.(Aza)
