Dilipost.com, Loron 24 Janeiru 2026– Tribunál Judisiál Primeira Instánsia Díli, liuhusi Juiz Turnu José Escurial, deside atu aplika medida koasaun Prizaun Preventiva ba arguidu nain tolu iha kazu alegadu krime violasaun seksuál hasoru feto.
Desizaun ne’e hasai hafoin hala’o interogatóriu dahuluk ba arguidu nain haat. Durante prosesu ne’e, arguidu sira hili direitu atu la ko’alia, nune’e Tribunál halo separasaun ba arguidu sira hodi rona depoimentu idak-idak.
Ministeriu Públiku, ne’ebé reprezenta husi Prokuradór Gustavo Soares, promove krime violasaun seksuál tuir Artigu 172 ho nia agravasaun iha Artigu 173 husi Kódigu Penál Timor-Leste.
Tuir Artigu 172, ema ne’ebé halo relasaun seksuál vajinál, anál ka orál ho violénsia, ameasa ka obriga vítima atu suporta hatama sasán ba órgaun seksuál sei hetan pena prizaun husi tinan 2 to’o 10.
Enkuantu Artigu 173 hateten agravasaun bainhira krime pratika ho abuza autoridade, hasoru vítima vulnerável, ka bainhira vítima mak labarik tinan 17 kraik, ho pena prizaun ne’ebé aas liu.
Iha alegasaun, Ministeriu Públiku husu Tribunál atu aplika Prizaun Preventiva tanba hahalok arguidu sira konsidera priense ba krime violasaun seksuál. Maibé husi parte Defeza, solisita atu aplika de’it medida koasaun Termu Identidade Rezidénsia (TIR).
Hafoin rona parte hotu, Tribunál deside aplika Prizaun Preventiva ba arguidu sira ho inisiál CODN, JGFPDS no JMPA, enkuantu ba arguidu GAAG, Tribunál aplika medida koasaun Termu Identidade Rezidénsia.
Defensór Públiku Humberto Alves, ne’ebé reprezenta arguidu nain tolu, hateten katak desizaun Tribunál bazeia ba provas eletrónika, la’ós ba deklarasaun arguidu sira-nia.
“Husi parte Defeza, ita haree provas ne’e ladún sufisiente, maibé ita simu desizaun Tribunál iha interogatóriu dahuluk ne’e,” dehan Humberto Alves ba jornalista sira, Sábadu (24/01/2026).
Nia mos hateten katak Defeza sei halo rekursu iha prazu loron 30 nia laran atu kontesta desizaun Tribunál Primeira Instánsia nian.
Enkuantu ne’e, Advogadu Pedro Aparicio, ne’ebé reprezenta arguidu GAAG, hateten katak nia kliente hetan medida koasaun Aprezentasaun Periódika, fulan ida dala rua, iha Eskadra Polísia Kristu Rei, hahú husi loron 1 no 15 fulan Fevereiru.
Nia dehan ba arguidu nain tolu seluk ne’ebé hetan Prizaun Preventiva, Tribunál konsidera faktu-faktu provadu, no hanesan Defeza nia parte sei la halo rekursu ba desizaun ne’e.
Tuir observasaun Dili Post iha fatin, prosesu interogatóriu ne’e atrai partisipa husi família sira, ne’ebé halo sala Tribunál nakonu ho ema. Hafoin hasai desizaun, família husi arguidu nain tolu sira tanis no hakarak hasai foto ikus ho arguidu sira molok lori sira ba Estabelesimentu Prizionál Bekora.
Maibé polísia la fó oportunidade ne’e no lori direitu arguidu sira ho algema ba prizaun atu kumpre medida koasaun Prizaun Preventiva.
Jornalista : Octaviana da Costa
