Dílipost.com,Loron 29 Maiu 2026 — Movimentu Foinsa’e Atsabe (MOFA) hato’o preokupasaun kona-ba kondisaun estrada ne’ebé liga Gleno ho Atsabe, iha Munisípiu Ermera, ne’ebé atualmente konsidera afeta diretamente moris povu, atividade ekonomia, edukasaun no saúde komunidade nian.
Iha komunikadu imprensa Porta-voz MOFA, Agustino Gomes hatete katak estrada Ermera–Atsabe ne’ebé uluk fasilita movimentasaun povu agora sai obstákulu boot ba dezenvolvimentu no ben-estar komunidade.
“Ermera nu’udar munisípiu ida-ne’ebé kontribui boot ba ekonomia nasionál liuhosi produsaun kafé no agrikultura. Tanba ne’e, Ermera merese infraestrutura ne’ebé di’ak no dignu,” dehan Porta-Voz agostinho Gomes ba Jornalista sira iha Jardin 5 de maiu.
Tuir MOFA, antes tinan ida ba kotuk, viajen hosi Dili ba Atsabe normalmente presiza de’it oras lima to’o neen. Maibé agora, tanba kondisaun estrada ne’ebé aat, povu tenke gasta oras 12 to’o 14 atu to’o ba destinasaun.
“Povu lakon tempu produtivu no enfrenta risku boot durante viajen naruk iha kondisaun estrada ne’ebé aat,” subliña Porta-Voz.
Movimentu ne’e mós dehan katak kustu transporte aumenta maka’as. Antes komunidade selu de’it US$5 atu viajen ba Atsabe, maibé atualmente tarifa sae ona to’o US$17.
“Ba família agrikultór no komunidade ne’ebé moris ho rendimentu limitadu, aumentu ida-ne’e sai karga ekonomika ne’ebé todan tebes,” dehan nia.
MOFA dehan situasaun ida-ne’e sai pior liu bainhira transporte públiku para opera tanba estrada la permite. Iha kazu balu, família sira obriga la’o ain hosi Atsabe to’o Gleno atu hetan nesesidade urjente ba oan eskola ka servisu seluk.
“Atu rezolve nesesidade urjente ne’e, ema tenke la’o kilometru atus ida resin antes to’o Gleno,” nia reafirma.
Movimentu ne’e konsidera katak problema estrada la’ós de’it kona-ba manutensaun infraestrutura, maibé problema direitu povu no responsabilidade Estadu nian.
“Estrada la’ós partidu ida nian hodi partidariza. Estrada mak direitu povu nian no obrigasaun Estadu atu hadi’a,” afirma MOFA.
Tanba ne’e, MOFA husu ba Governu Sentrál, Ministériu Obras Públikas, MPIE, Munisipál Ermera no autoridade relevante sira atu implementa imediatamente medida konkretu hodi konstrui no hadi’a estrada Ermera–Atsabe.
“Povu lakohi tan promessa polítika ka serimónia lansamentu ne’ebé la lori mudansa real. Povu presiza rezultadu konkretu,” Porta-Voz hatutan.
Iha komunikadu refere, MOFA mós kritika lider polítiku balu ne’ebé konsidera la fó mudansa signifikativu ba povu Ermera maski ukun ona durante tempu naruk.
“Hosi inísiu ezisténsia MOFA nian, ami lakon esperansa ba kapasidade lideransa polítika balu tanba povu Ermera kontinua moris iha kondisaun difisil,” nia realsa.
MOFA mós reafirma nia pozisaun polítika “GOLPUT” ka la vota iha eleisaun, tanba konsidera partidu polítiku sira seidauk fó rezultadu konkretu ba povu.
“Partidu sira promete barak maibé povu Ermera nafatin moris iha mizéria,” tuir Porta-Voz.
MOFA konvida juventude, estudante, intelektuál no lideransa komunitária sira atu hamutuk promove unidade no konsiénsia sosial hodi defende interese komunidade.
“Luta ba estrada di’ak la’ós de’it luta ba infraestrutura, maibé luta ba dignidade, igualdade no futuru di’ak ba povu Ermera no Atsabe,” konklui Porta-Voz Mofa.
Jornalista : Azacsi Quintão
