DiliPost.com-Primeiru Ministru (PM), Kay Rala Xanana Gusmão no Vise-Primeiru-Ministru, Ministru Koordenadór Assuntus Ekonómikus no Ministru Turizmu no Ambiente (V-PMMKAEMTA), Francisco Kalbuadi Lay realiza enkontru ho seitór privadu Xina hakarak loke investimentu iha Timor-Leste (TL).
Iha enkontru ne’e, Xefi Governu introduz programa tomak husi IX Governu Konstitisionál nian durante tinan lima (5), nia laran se’i fokus maka’as ba kontrusaun Estadu no Nasaun.
“Ha’u fó hatene ba seitór privadu iha Governu tinan 5 nia mandatu atu dezenvolve Ekonomia no husu atu investe iha saida de’it mak sira bele,”informa PM Xanana hafoin enkontru ho seitór privadu Xina iha Otél, Sofitel Sidade Hangzhou Provinsia Zheuhiang-Xina.
TL presiza tebes investimentu estranjerus ne’ebé bele tulun dezenvolvimentu Infraestrutura no Ekonomia povu TL.
Xefi Governu hatutan, IX Governu iha komprimisu bo’ot, oras ne’e daudaun halo reforma ba ninia Lei Investimentu no buka fasilita sistema seguru hodi fó fi’ar ba seitór privadu Estranjeirus husi Asosiasaun Nasoins Sudeste Aziátiku (ASEAN), no ASIA inklui Europa bele loke Investimentu.
Xanana husu buat ne’ebé TL presiza liu mak investimentu Infraestrutura Estrada, Bee Moos, Portu, Aeroportu, Agrikultura, Peskaz, seitór Mina no Gas nian liu-liu esplorasaun Greater Sunrise no seluk tan (nst).
Seitór privadu hirak ne’e, sei ba Timor atu hare’e iha áreia saida de’it sira bele hala’o,”ita se’i fó ajuda iha área oin-oin de’it,”dehan Xanana.
Enfrenta Problema
Xanana rekoñese TL sei enfrenta problema barak iha seitór oin-oin no Rekursu Umanu (RU), maibé povu no Nasaun iha mehi bo’ot atu hadi’a rai ne’e, la’o ba oin ho apoiu seitór privadu Estranjeirus sira nia Investimentu.
“Ami presiza tebes investimentu atu hadi’a Infraestrutura no dezenvolve Ekonomia TL,”dehan Xanana durante enkontru ho Emprezariu kuaze nain-20 iha Otel Sofitel.
Durante enkontru, setór privadu jigante hosi nasaun Xina, Macau, Singapura introduz mós sira nia Profile Kompañia ne’ebé intersante hakarak loke Investimentu iha TL.
Tu’ir área hirak ne’ebé Xefi Governu aprezenta, enkontru ne’e, akompaña direta husi Ministru Administrasaun Estetal (MAE), Thomás do Rosario Cabral, Ministru Planeiamentu Investimentu Estratejiku (MPIE), Gastão de Sousa, Ministru Juventude Desportu Arte no Kultura (MJDAK), Nelio Issac Sarmento no seitór privadu reprezenta husi eis Prezidente Camara Comersiu Industria Timor-Leste (CCI-TL), nu’udar mós Diretur Kompañia Aero Dili, Lorenço de Oliveira, Embaixador TL ba Xina, Abrão Santos no Adido Komersiu Indistria TL ba Xina, Benjamin ‘Saimesak’.(javel)
