Dilipost.com – Atleta boxing nasional, Elisio Raimundo Gaio konsege hetan medalla osan-mutin iha Jogu Sudeste Aziátiku (SEA Games) ba dala 33, tinan 2025, iha kategoria Peso Legeru Mane(63,5 kg), hafoin lakon iha final kontra atleta husi Tailándia, Khunatip Pidnuch.
Rezultadu ida-ne’e sai hanesan indikadór importante ba dezenvolvimentu modalidade boxing iha Timor-Leste, no hatudu kapasidade atleta nasional sira atu kompeti ho rai sira seluk iha nivel rejionál. Maski la konsege lori medalla osan-mean, prestasaun ne’e konsidera hanesan suksesu ida ba nasaun, tanba atleta Timor-Leste bele to’o fase final iha eventu desportu boot ida ne’e.
Iha deklarasaun ofisiál, Elisio Raimundo Gaiohato’o nia kontentamentu no agradecimentu ba apoiu ne’ebé simu durante prosesu preparasaun ba kompetisaun.
“Hau senti kontente ho grasa ne’ebé mai haraik mai hau. Hau agradese ba povu Timor-Leste ne’ebé sempre fó apoiu ba boxing nasional. Hau mos hato’o obrigado ba hau-nia família hotu, espesialmente ba hau-nia aman no inan, ne’ebé kontinua fó apoiu ba hau,” dehan Atleta Nasional liu husi via whatsapp,(19/12/2025).
Medalla osan-mutin ida-ne’e aumenta tan rekordu prestasaun desportu Timor-Leste iha SEA Games no sai hanesan motivasaun ba atleta sira seluk atu kontinua halo preparasaun ho di’ak hodi reprezenta nasaun ho dignidade iha kompetisaun internasionál sira tuir mai.
Jornalista : Azacsi Quintão
