DiliPost.com – Tribunál Judisial Primeira Instansia Dili (TJPID) iha Tersa-Feira (28/07) kalan, realiza prosesu Primeiru Interogatoriu deside aplika Medida Kausaun (MK) ho osan $ 3 Mill ba kada arguidu hamutuk nain-28 no arguidu kazal nain 2 aplika medida Proibisaun Auzensia no medida koasaun Termu Identidade Rezidensia (TIR).
Iha aprezentasaun arguidu ba Tribunal Ministériu Públiku (MP) promove ho krime haat hanesan Krime Jogu ilisitu, Asosiasaun Kriminoza, Burla informatika no krime Brankeamentu kapitais, tanba deskonfia komete kazu ilegal Scam Call Center.
Iha prosesu Primeiru Interogatoriu ne’e, Tribunál halo tiha identifikasaun ba sidadaun Xineza nain-30, Tribunal kontinua tama ba alegasaun MP no parte Defeza nia.
Nune’e iha alegasaun MP reprezenta Prokurador, Matias Soares husu Tribunál aplika MK ne’ebé antes ne’e Tribunál hatun ona despaixu ba arguidu sira seluk.
No parte Defeza husu Tribunal atu fo liberdade ba arguidu sira tanba la priense ba fragrante delitu.
Maibé, hare ba despaixu Tribunal nia aplika MK osan $ 3 mill ba kada arguidu hamutuk nain-28 no arguidu kazal nain 2 aplika medida Proibisaun Auzensia no TIR.
Molok ne’e Autoridade Seguransa kompostu husi Servisu Migrasaun (SM), Servisu Informasaun Polisia no Diresaun Servisu Investigasaun Kriminal (DSIK) dezmantela tan rede krime transnasionál scammer online no asegura sidadaun estranjeiru nain 30 iha Otel bot ida ne’ebe lokaliza iha area Kristo-Rei, Aldeia Fatukama, Suku Meti-Aut Dili.
Antes halo operasaun ho eskala bo’ot ne’e, ekipa servisu serku uluk tiha ona aredores otel, nune’e wainhira membru sira tama ba laran sidadaun estranjeiru nain rua tenta halai subar maibé ekipa servisu konsege duni tuir ikus mai kaptura hikas fali.
Ekipa servisu mos prende objetu krime barak iha otel ida ne’ebe konsidera hanesan evidénsia teknolojia dijitál hodi halo burla informatika no asegura Xinez nain 30 kompostu hosi feto 4 no mane 26. Enkuantu sira nia pasaporte orijinal iha 7, kopia iha 17 restante sei iha hela ajensia balu.
Hafoin halo aprensaun ba sidadaun estranjeiru hirak ne’e, ekipa servisu lori kedas sira ne’e ba asegura iha edifisiu PNTL Kuartel Jeral Caicoli hodi submete ba prosesu investigasaun ne’ebe kle’an.
Jornalista : Octaviana Costa
