Dilipost.com-Prezidénsia Repúblika, liu husi Unidade Sosiedade Sivíl no Asuntu Sosiál (SSAS), halo vizita ida ba família ida iha Suku Mau-Nunu, Munisípiu Ainaro, ne’ebé durante tempu naruk hasoru difikuldade moris tanba membru família ida sofre difisiénsia Fíziku.
Sabina Bianco, membru husi família refere durante tinan-30 ona nia sofre kondisaun saúde fíziku ne’ebé limita nia movimentu no halo nia labele ajuda atividade loroloron nian atu sustenta família.
Koko Xavier, nuudar aman husi Sabina Bianco, ho sentimentu triste, relata katak situasaun família sai todan liu tanba nia parseira kaben destiñu iha tinan hirak liu ba no husik hela responsabilidade bo’ot ba nia atu sustenta oan nain hitu, inklui Sabina ne’ebé agora enfrenta problema saúde ne’ebé grave.
“Ha’u la iha ona kbi’it atu halo servisu atu sustenta ekonomia família tanba idade avansadu ona. Ha’u agradese tebes ba Nai Prezidente Ramos-Horta ne’ebé haruka ekipa mai lori apoiu no nesesidade bázika hodi ajuda ami sustenta moris loroloron,” hateten Koko Xavier.
Iha sorin seluk, oan feto Joaninha de Araújo, hanesan alin feto husi Sabina Bianco (Defisiente), hateten katak nia deside hapara nia estudu atu dedika tempu tomak hodi tau matan ba nia bin ne’ebé presiza asisténsia loron-loron.
“Ha’u deside hapara estudu tanba hakarak tau matan ba bin nia saúde. Dalaruma ha’u no alin feto ida tan troka malu hodi hein nia sira seluk sei kiik, Triste tebes tanba depois ha’u nia inan mate, ha’u maka sai hanesan inan ida ne’ebé agora tau matan ba nia,” hateten Joaninha.
Joaninha dehan tan, hanesan joven ida, nia iha mehi no objetivu atu kontinua estuda no realiza futuru di’ak hanesan joven sira seluk. Maibé realidade ekonomia família no kondisaun saúde nia bin nian obriga nia atu adia mehi sira ne’e.
“Ha’u iha mehi atu avansa hanesan joven sira seluk, maibé ha’u la bele realiza agora tanba ekonomia família la sufisiente no bin nia kondisaun saúde presiza atensaun permanente. Ha’u husu ba Prezidente Avo Ramos-Horta atu bele fo serbisu ruma, maske hau nia Diploma seidauk iha maibé fo netik serbisu dasa rai mos to’o ona, hau liu-liu abo ajuda harii uma mahon ida ba ami no mos ajuda sosa kadeira roda ida ba hau nia bin atu fasilita nia moris loroloron,” nia dehan.
Durante vizita ne’e, ekipa Prezidénsia Repúblika mos kontinua halo observasaun ba membru família seluk, Calisto Fevriano Noronha de Araújo, ne’ebé sofre moras iha ulun durante tinan sanulu resin ida ona.
Tuir informasaun hosi família, durante tempu naruk Calisto deit toba iha fatin tanba kondisaun saúde ne’ebé limita nia movimentu. Família no Parentes husu Prezidénsia Repúblika atu bele fasilita kadeira roda ida hodi ajuda mobilidade no fasilita kuidadu nia loroloron.
Vizita ida ne’e sai parte hosi kontinuidade programa solidariedade sosial ne’ebé durante mandatu prezidensiál, José Ramos-Horta nafatin fó prioridade ba família vulnerável sira ne’ebé hela iha situasaun difísil no presiza apoiu umanitáriu urgente hosi Governu.(anita)
