Dílipost.com, Loron 22 Juñu 2026 – Prezidente Repúblika José Ramos-Horta hato’o nia sentidu kondolénsia bá família, lideransa no militante Partidu FRETILIN sira kona-bá mate Eis-Prezidente Francisco Guterres “Lú Olo”, ne’ebé hakotu iis iha ospitál ida iha Kuala Lumpur, Malázia.
Iha deklarasaun ofisiál ida, Xefe Estadu dehan simu notísia kona-ba Maktoban eis-Prezidente Repúblika ne’e ho laran triste tebes no konsidera nia mate nu’udar lakon boot ida ba Nasaun Timor-Leste.
“Ha’u simu notísia ne’e ho triste tebes no konsidera Prezidente Repúblika Francisco Guterres Luolo nia mate nu’udar lakon boot ida ba Nasaun,” hateten Prezidente Repúblika iha pájina ofisiál.
Tuir Prezidente Repúblika, durante nia vizita badak ba Malázia husi loron 13 to’o 16 Juñu, nia ba vizita diretamente ospitál ne’ebé Lú Olo hetan tratamentu iha Unidade Kuidadu Intensivu (ICU).
Iha okaziaun ne’e, nia rona esplika médika kona-ba kondisaun saúde eis-Xefe Estadu nian hosi médiku timoroan sira no ko’alia mos ho nia espoza, Cidália Lopes Nobre Mouzinho Guterres.
Prezidente Repúblika dehan katak iha momentu ne’e nia hetan ona informasaun kona-ba gravidade hosi kondisaun klínika Lú Olo nian. Maibé tanba respeitu ba privasidade família no pasiente nian, nia la fahe detallu sira ne’e ba públiku bainhira fila mai Timor-Leste.
Nia hateten katak informasaun kona-ba kondisaun krítika Lú Olo nian deit mak nia fahe privadamente ho lideransa máximu partidu nian.
Iha nia mensajen, Prezidente Repúblika mos presta omenajen ba kontribuisaun boot Eis Prezidente Repúblika Francisco Guterres “Lú Olo” nian ba luta libertasaun no dezenvolvimentu Estadu Timor-Leste.
“Prezidente Francisco Guterres Lu-olo nu’udar patriota boot ida, líder sentrál ida ba luta libertasaun nian, líder partidu istóriku FRETILIN nian no kaer kargu aas hotu-hotu Estadu nian,” dehan nia.
Prezidente Repúblika informa katak nia kontaktu ona Embaixadór Timor-Leste iha Malázia atu koordena medida nesesária sira hotu hamutuk ho família no instituisaun Estadu relevantes sira.
Aleinde ne’e, nia mos kontaktu ona kompania aérea AERO DILI atu prepara voo espesiál ida ba transporte mate-isin no membru família sira mai Timor-Leste.
Prezidente Repúblika reafirma katak Prezidénsia Repúblika, iha koordenasaun ho órgaun soberania no instituisaun Estadu sira seluk, sei fó apoiu tomak no onra Estadu ne’ebé dignu ba eis-Prezidente Repúblika Francisco Guterres “Lú Olo”.
Eis-PR Francisco Guterres “Lú Olo” lakon ida ba Timor-Leste, liu-liu ba família, FRETILIN no povu timoroan sira ne’ebé durante ne’e hatene nia nu’udar figura importante ida iha luta libertasaun nasionál no konstrusaun Estadu independente.
