Dílipost.com, Loron 1 Maiu 2026 — Prezidente Repúblika, José Ramos-Horta, hato’o deklarasaun imprensa ho laran triste kona-ba falesimentu jornalista seniór Otelio Ote, ne’ebé mate iha loron 28 Abril 2026.
Prezidente konsidera perda ida ne’e nu’udar lakon nasionál ne’ebé kle’an ba Timor-Leste, liuliu iha área mídia no jornalizmu.
Iha nia mensajen, Prezidente haktuir katak Otelio Ote la’ós de’it jornalista ida, maibé mós nu’udar pilar ba lia-loos no edukadór ne’ebé dedika nia moris ba servisu jornalístiku ho étika no integridade.
Nia kontribuisaun ba mídia hahú dezde tinan 1988, no durante tempu krítiku referendu 1999, nia serbisu nu’udar korespondente ba Associated Press TV no NHK Japaun.
Hafoin independénsia, Otelio Ote ko-funda jornal Timor Post iha tinan 2000, ne’ebé sai hanesan fundamentu importante ba dezenvolvimentu imprensa livre no independente iha nasaun ne’e.
Durante dékada barak, nia hala’o knaar hanesan jornalista, xefe-editór, diretór, no Prezidente Konsellu Imprensa, no ikus mai servisu nu’udar asesór mídia ba RAEOA.
Prezidente mós salienta katak legadu boot Otelio Ote nian mak nia kontribuisaun iha formasaun jerasaun foun jornalista timoroan sira, liuhusi sentru formasaun jornalizmu Timor Post nian. Nia konsideradu nu’udar mestre ida iha komunidade mídia.
Iha deklarasaun ne’e, Prezidente Ramos-Horta mós hanoin ba liafuan ikus ne’ebé forte husi Otelio Ote “Ha’u remata hakerek notisia bainhira matan taka ona,” ne’ebé, tuir Prezidente, hatudu nia dedikasaun tomak ba profissão jornalizmu.
Prezidente hato’o kondolénsia profunda ba família enlutadu, inklui nia kaben no oan sira, no expresa esperansa katak sira bele hetan konfortu husi hatene katak nia kontribuisaun sei hela nafatin iha história mídia Timor-Leste.
Jornalista: Anita Silva
