DiliPost.com- Prezidente Republika (PR) no Laureadu Nobel ba Pás, José Ramos-Horta, Sesta feira (24/10) ho kometiva aranka ba iha Kuala Lumpur partisipa serimónia adezaun formál Timor-Leste (TL) nian nu’udar Estadu Membru ba da-11 Asosiasaun Nasaun Sudeste Aziátiku (ASEAN).
Simeira ASEAN ba dala-47 no Simeira sira Relevante sei hala’o iha Kuala Lumpur, Malázia, husi loron 26 to’o 28 fulan-Outubru 2025. Ho tema “Inkluzividade no Sustentabilidade”, simeira ne’e sei halibur Xefe Estadu no Governu na’in-30 resin, inklui Prezidente EUA, Donald Trump, Primeiru-Ministru Xina, Li Qiang, Prezidente Brazíl, Luiz Inácio Lula da Silva, Prezidente Áfrika Súl, Cyril Ramaphosa, no Primeiru-Ministru Índia, Narendra Modi.
Iha loron 26 fulan-Outubru, Prezidente Ramos-Horta sei sai sasin ba momentu istóriku importante ida ne’e ba nasaun iha Sentru Konvensaun Kuala Lumpur. Asinatura Deklarasaun kona-ba Admissaun Timor-Leste nian ba ASEAN reprezenta kulminasaun husi preparasaun institusionál, diplomátika no téknika durante dékada rua nia laran ba integrasaun totál iha komunidade rejionál.
“Ami-nia prezensa iha Simeira ASEAN ida-ne’e nu’udar testamentu ba kompromisu metin Timor-Leste nian ba ami-nia destinu nu’udar membru totál família Sudeste Aziátiku nian, ita la’ós de’it hametin ita-nia pozisaun iha rejiaun. Maibé mós harii ponte ho parseiru globál xave sira. Timor-Leste hateke ba oin no prontu atu kontribui ba pás, estabilidade no prosperidade komún iha rejiaun”hateten Prezidente Ramos-Horta.
Aliende ne’e iha loron 27 fulan-Outubru, Prezidente Ramos-Horta sei hala’o enkontru bilaterál estratéjiku oioin, inklui diskusaun ho Sekretáriu Estadu EUA, Mark Rubio, no ninia delegasaun.
Iha kalan, Prezidente sei partisipa iha jantar ida ne’ebé oferese husi Primeiru-Ministru Malázia nian, Sua Exelénsia Dato’ Seri Anwar Ibrahim.
Nune’e mos loron 27 fulan-Outubru, Prezidente Ramos-Horta sei hasoru malu ho Prezidente Konsellu Europeu, Sua Exelénsia António Costa.
Xefi estadu sei remata ninia vizita ofisiál ba Malázia iha ninia kapasidade nu’udar Profesór Adhuntu Onoráriu, hodi hato’o palestra prinsipál ida ba estudante sira no ba Eskola Direitu no Governasaun iha Universidade Taylor’s.
Vizita ida-ne’e subliña dedikasaun metin Prezidente Horta nian atu promove interese estratéjiku Timor-Leste nian iha nível mundiál no hametin lasu sira ne’ebé forte liután ho parseiru rejionál no internasionál sira.
Jornalista : Azacsi Quintão
