Dilipost.Com- Ministra Reinu Unidu ba Indo-Pasífiku Anna Marie Trevelyan sei Vizita Timor-Leste husi 29 Setembru to’o 1 Outubru ne’e.Durante Vizita Ministra Anna Marie sei Deklara Hikas Reinu Unidu nia apoiu ba Timor Leste Liu Liu iha Setor saúde , nutrisaun, igualdade jéneru no Timor-Leste nia adezaun ba ASEAN.
Vizita Dahuluk Ministra Reinu Unidu ba Timor-leste sei hala’o sorumutu nível altu ho Prezidente Repúblika Timor-Leste José Ramos-Horta, Primeiru Ministru Xanana Gusmão no Ministru Negósiu Estranjeiru no Kooperasaun Bendito dos Santos Freitas.
Iha Vizita ne’e Parte Rua Sei halo Diskusaun sira foka ba opórtunidade atu haklean kooperasaun bilaterál entre nasaun rua liuhusi hasa’e kooperasaun iha saúde no inisiativa konjuntu ba dezenvolvimentu.
Durante iha Timor Leste Ministra sei lansa Programa Saúde UK-UNICEF ((Reinu Unidu) atu ajuda kombate malnutrisaun ba labarik. Programa ne’e sei fornese treinamentu ba voluntáriu komunidade no estabelese grupu apoia atu enkoraja no informa inan aman sira kona-ba prátika alimentár saudável.
Ministra Trevelyan mós sei partisipa iha eventu Feto iha Lideransa (Women in Leadership) ne’ebé organiza husi Governu Timor-Leste hamutuk ho UN Women.
Eventu ida ne’e apoiu husi kontribuisaun fundus Reinu Unidu nian ba UN Women, hanesan parte ida husi programa Reinu Unidu-ASEAN ho total £ 3.2m ne’ebé anúnsia iha inísiu tinan ida ne’e. Programa ne’e mos sei promove feto nia papél iha inisiativa ba pás no seguransa iha Sudeste Aziátiku tomak.
Sudeste Aziátiku mak sentru globál ba kresimentu no prosperiedade ekonómiku, no Reinu Unidu nia partisipasaun hanesan Parseiru Diálogu ASEAN hodi apoiu Primeiru Ministru nia prioridade ba kresimentu ekonómia.
Aleinde kooperasaun ba dezenvolvimentu, Reinu Unidu suporta Timor-Leste atu mantein estabilidade rejionál, ho Ró Navál Royal HMS Spey ne’ebé vizita Dili iha fulan Agostu 2023.
“Nu’udar Parseiru Diálogu ASEAN, Reinu Unidu kontinua servisu hamutuk ho parseiru iha Sudeste Aziátiku tomak no Indo-Pasífiku atu asegura pás no prosperiedade ne’ebé sustentável iha rejiaun ne’e no responde ba dezáfiu sira iha futuru. Iha hau nia vizita dahuluk ba Timor-Leste, hau buka opórtunidade diskusaun atu hametin ami nia relasaun bilaterál no kolaborasaun kona-ba prioridade saúde no dezenvolvimentu konjuntu.”sita Iha Komunikadu ne’ebe DiliPost.com Asessu iha Loron 29/9 ne’e.
Governante nee Imforma sei kontinua firme hodi apoiu Timor-Leste nia adezaun ba ASEAN, nu’udar parseiru prinsipál iha sena globál. Reforsa involvimentu Reinu Unidu ho Timor-Leste hatudu komitmentu longu prazu ba rejiaun Indo-Pasifiku, aliña ho Atualizasaun Revizaun Integrada ne’ebé publika iha fulan Marsu 2022”.” Ministra ne’e Afirma .
Embaixadór Reinu Unidu ba Timor-Leste Dominic Jermey hateten
Ministra Reinu Unidu ba Indo-Pasifiku, Anne Maria-Trevelyan nia vizita ba Timor-Leste reafirma hikas Reinu Unidu nia komitmentu atu haklean ami nia kolaborasaun ho Timor-Leste, nasaun ne’ebé importante tebes ba Reinu Unidu.
“Vizita ne’e sei fornese opórtunidade atu diskute relasaun ne’ebé forte, ne’ebé eziste ona entre Reinu Unidu no Timor-Leste liu-liu kona-ba saúde no nutrisaun, prioridade dezenvolvimentu no ami nia apoiu ba Timor-Leste nia adezaun ba ASEAN. Ami hein atu haree Timor-Leste dezenvolve sai nasaun estável no prósperu, nomós programa Reinu Unidu-UNICEF mak ezemplu ida husi ami nia komitmentu sériu atu apoiu Prezidente nia prioridade kona-ba saúde no nutrisaun.”Hakotu Diplomata UK ne’e. (JAVEL)
