OECUSSE (DILI Post)- Reprejentante Povu Husi Aldeia Bi-Eli Suku Bene-ufe Postu Nitibe Marcos Meni ,Husu Governo Atu Loke Dalan ba Komunidade Bi-Eli, Nune’e Sira bele Assesu.
Aldeia Bi-Eli Lokaliza iha Fronteira Kakabei Indonesia nian, Durante Timor Leste Hetan independénsia To’o ohin Loron Seidauk Assesu ba Estrada ,Edukasaun,Eletrisidade ,Saude no Infrastrutura sira seluk.
Tuir Xefi Suku Bene-ufi haktuir Aldeia Bi-Eli Hanesan Aldeia ne’ebe Izolado tebes iha Oecusse tanba Agora laiha Ulun bo’ot Nasaun Nian Atu Tau Matan.
Marcos Dehan Durante ne’e Komunidade Bi-Eli, atu assesu ba Merkadu Laiha Dalan,Nune’e Obrigado Komunidade sira tenki hakat fali mai iha Fronteira Kakabei Indonesia nian ,hodi bele Sosa Nesesidade Bazika Ba Loron loron nian.
“Hanesan Reprejenta Povu, Ami husu mak Loke Estrada atu nune’e Komunidade iha Bi-Eli bele Assesu ba Fatin ne’ebe deit,Tanba Durante Ukun aan to’o agora sira mak nafatin Moris iha Izolado.”Dehan Xefi suku Bene-ufe ,hafoin Simu Distribuisaun Aihan Nesesidade Bazika ne’ebe Oferese husi Ministra MSSI foin lalais ne’e.
Alende Ida ne’e Lideransa Lokal ne’e mos Husu Ba Governu Atu Hari Eskola iha Fatin ne’e, tanba Durante ne’e Estudantes sira tenki lao Ain oras Lima nia laran mai iha Area Citrana nian hodi assesu ba Eskola.
“Eskola deit laiha,Labaraik sira iha ba fali Eskola iha Citrana,lao Ain deit husi ba To’o ne’eba Lori Oras lima nia laran,tanba ho distancia ne’ebe dok ikus mai labarik sira para hotu Eskola,tanba ne’e mak Ami husu Ba Ministériu Edukasaun se Bele loke netik Eskola ruma iha ne’e. ” marcos Akresenta.
Iha setor Saude Lideransa Lokal ne’e Haktuir Husi Ukun Aan To’o Agora,Komunidade sira la assesu ba Asisténsia saude,nune’e wainhira sira hasoru moras ruma tenki lao Ain kilometro 20 Resin ba iha Sentru Saude, Suku Lamasi Postu Nitibe nian.
Iha Area Eletrisidade Nian ,Lideransa Lokal ne’e Konta Tuir Durante Tinan 24 ona ,Komunidade sira iha Aldeia Bi-Eli Moris Nakukun Laran tanba Laiha Eletrisidade atu halakan Naroman iha tempo Kalan.
Iha Setor Telekomunikasaun Povu iha Aldeia Bi-Eli labele Asesu uza telemovel, tanba Laiha Linha Internet husi Operador Telemor, Telkomsel no Timor Telecom.
Imformasaun ne’ebe Dilipost.com Buka hatene husi Fatin ne’e mak ,To’o Agora Komunidade sira kontinua Uza Moeda ka Osan Rupiah nian hodi bele ba Sosa Nesesidade moris,tanba Husi Osan Rupaih ne’ebe sira uza mak Hafasil sira hodi sosa Aihan Nesesidade Bazika oja Parte Kakabei Indonésia ne’ebe ho distansia Besik Duke husi Timor-Leste lao Kuaze lori Kilometero 20 molok aseso ba Merkado.
Imformasaun seluk ne’ebe Dilipost.com Rekoila iha Terenu mak, Ukun Aan Tinan 24 ona ,mak Foin Primeia Vez Hetan Vizita Espesial Husi Ekipa Konjunta Ministeriu Solidaridade Sosial no Inkluzaun, Ministeriu Saude, Ministeriu Edukasaun,Vice Ministra Asuntu ASEAN no Vice Ministra Finansas.
Husi Vizita Dahuluk ba Aldeia Bi-Eli, Membro Governu nain Lima ne’e bele Hare Besik liu tan ,Difikuldade ne’ebe Povu Hanesan iha Baze, Liu liu Menus aihan,La assesu ba Edukasaun no Saude, la asesu ba Subsidiu no Husi Parte MNEK nian oinsa atu bele kolabora ho Governu Indonézia nune’e bele Hafasil Movimentu entre Komunidade rai rua iha Fronteira Timor-Leste no Indonézia.
Enkuantu Total Uma kain iha Aldeia Bi-Eli hamuutuk 21 ho Nia Populasaun 84 ne’ebe to’o Agora Kontinúa Moris iha Situasaun Difisil.
Jornalista:Javelino Da Silva
