Dílipost.com,Loron 28 Maiu 2026 — Parlamentu Nasionál (PN) aprova ona proposta Orsamentu Retifikativu (OR) ba tinan 2026 iha faze jeneralidade ho votus a-favór 42, abstensaun 23 no laiha votu kontra.
Aprovasaun ne’e marka pasu importante ida ba Governu atu implementa medida urjente sira ne’ebé konsidera nesesáriu atu responde ba dezafiu ekonomia no situasaun globál atual.
Primeiru-Ministru (PM), Kay Rala Xanana Gusmão, lori Governu nia naran agradese ba bankada parlamentár no komisaun sira ne’ebé simu no trata proposta ida-ne’e ho karákter urjénsia.
PM Xanana mós agradese ba deputadu sira nia partisipasaun aberta, onesta no demokrátika durante debate iha Parlamentu Nasionál.
“Agradese tebtebes ba partisipasaun aberta, onesta no demokrátika hosi deputadu sira. Bainhira aprovadu, Governu sei ezekuta ho seriedade,” hateten PM Xanana iha Parlamentu Nasionál.
Iha aprezentasaun, Xanana destaka medida prinsipál balun ne’ebé inklui iha alterasaun orsamentál ida-ne’e, liuliu kriasaun rezerva estratéjika kombustível nasional ho valór US$174,3 milhõens.
Rezerva ida-ne’e sei utiliza atu garante nesesidade kombustível nasional ba produsaun eletrisidade durante maizumenus fulan hitu, inklui fornesimentu ba Hera, Betano, RAEOA no Ataúro.
Aleinde ne’e, Governu mós propoin programa subsídiu kombustível ho montante US$42 milhõens atu hamenus impaktu hosi aumentu folin kombustível internasionál ba família no negósiu sira iha rai-laran.
Proposta alterasaun orsamentu ne’e inklui mós medida seguransa alimentár hanesan reforsu estoke foos iha Sentru Lojístika Nasionál, rekrutamentu kadetes PNTL, despeza relasiona ho Prezidénsia Pro Tempore CPLP no reforçu Rezerva Kontinjénsia Estadu.
Ho alterasaun ida-ne’e, montante total Orsamentu Estadu 2026 sae hosi US$2,291 biliaun ba US$2,392 biliaun, ho aumentu hamutuk US$101,1 milhõens.
Governu esplika katak aumentu ida-ne’e la’ós rezultadu hosi transferénsia adisionál hosi Fundu Petrolíferu, maibé liuhosi reajustamentu fonte finansiamentu sira, utilizasaun saldu jestaun, saldu konta bankária ne’ebé seidauk utiliza no reforsu receitas doméstikas.
Tuir kalendáriu Parlamentu, hafoin aprovasaun iha jeneralidade, proposta alterasaun orsamentu sei tama ba diskusaun detalhadu entre loron 29 Maiu to’o 2 Juñu 2026, antes votasaun finál ba alterasaun dahuluk Lei Númeru 8/2025 kona-ba Orsamentu Jerál Estadu.
Jornalista : Azacsi Quintão
