Dílipost.com, Loron 26 Maiu 2026 — Komisaun C Parlamentu Nasionál aprova ona relatóriu no pareser kona-ba proposta Orsamentu Retifikativu 2026 ne’ebé Governu submete ho pedidu urjénsia. Aprovasaun ne’e hala’o iha reuniaun komisaun ne’ebé partisipa hosi deputadu na’in sia(9).
Prezidente Komisaun C, Deputadu Cedeliza Faria do Santos, hatete katak relatóriu no pareser ne’e inklui mós rekomendasaun hosi komisaun parlamentar sira seluk. Nia esplika katak Komisaun C konsidera aspetu importante sira iha proposta orsamentu ne’e, inklui problema ne’ebé hasoru durante debate plenária.
“Husi deputadu na’in sia ne’ebé integra iha Komisaun C, hotu marka prezensa no relatóriu ne’e hetan aprovasaun ho votus lima hosi bancada Governu, CNRT no PD,” hatete deputada Cedeliza iha Parlamentu Nasionál.
Nia aumenta tan katak bancada opozisaun hanesan FRETILIN no PLP halo abstensaun, no la iha deputadu ida mak vota kontra relatóriu ne’e.
Tuir Cedeliza, medida importante balun ne’ebé Governu introdús iha orsamentu retifikativu mak rezervasaun subsidiu ba kombustível, alokasaun osan ba Ministériu Interior no apoiu ba setór agrikultura atu garante disponibilidade ai-han. Nia konsidera katak proposta ne’e la viola Konstituisaun, regra legal ka regimentu Parlamentu nian.
Kona-ba kalendáriu debate, nia informa katak debate no aprovasaun iha Jeneralidade sei hala’o iha kinta-feira, tanba kuarta-feira feriadu. Depois ne’e, Parlamentu sei tama ba fase espesialidade durante loron tolu antes halo redasaun final.
“Sé la iha impedimentu, Loron 05 fulan Juñu Prezidente Parlamentu bele haruka ona dokumentu ba Prezidente Repúblika atu hetan promulgasaun,” nia dehan.
Cedeliza mós esplika katak orsamentu retifikativu ne’e la foti osan hosi Fundu Petrolíferu. Governu halo de’it ajustamentu hosi reseitas doméstikas, transferénsia entre ministériu sira no utilizasaun osan rezerva ne’ebé seidauk uza.
Tuir nia, aumentu orsamentu ne’e hamutuk besik 101 milhõens dolar, ka serka 4% hosi orsamentu inisiál. Orsamentu Estadu ne’ebé antes hamutuk US$2,4 biliaun agora sae ba US$2,5 biliaun.
“Importante atu públiku la sala komprende tanba aumentu ne’e la boot tebes no Governu uza mekanizmu legal sira ne’ebé apropriadu,” konklui Cedeliza Faria do Santos.
Jornalista Estajiaria : Eduarda Do Costa
