Dílipost.com, Loron 26 Maiu 2026 — Prezidenti Komisaun C Parlamentu Nasionál, Deputada Cedeliza Faria do Santos, hatete katak Komisaun C apoia polítika Governu atu aumenta reseitas doméstikas, maibé sei haree didi’ak montante taxa ne’ebé sei aplika ba komunidade.
Deputada Cedeliza esplika katak durante ne’e reseitas doméstikas seidauk sufisiente atu sustenta despezas básiku Estadu nian, inklui pagamentu saláriu no vensimentu sira.
“Komisaun C dala barak fó atensaun ba reseitas doméstikas tanba to’o agora seidauk sufisiente atu sustenta saláriu no vensimentu de’it,” hateten Cedeliza iha Parlamentu Nasionál.
Nia dehan katak, desde ukun-an iha 2002, tempu ona ba sidadaun sira kontribui liu tan ba reseitas Estadu nian. Maski nune’e, Komisaun C sei konsidera kapasidade ekonomia povu nian antes determina montante taxa.
“Kontribui ami konkorda, maibé kona-ba montante hanesan US$5 ka US$10, ne’e sei haree fila-fali tuir realidade reseitas loron-loron komunidade nian,” nia dehan.
Tuir nia, Komisaun C sei bolu autoridade relevante sira atu klarifika razaun hosi proposta montante taxa ne’e, atu asegura katak medida ne’e la todan ba povu.
Cedeliza subliña katak apoiu polítika ba aumentu reseitas Estadu importante tebes, liu-liu tanba Komisaun C responsavel ba área finansas públikas. Maibé, desizaun final kona-ba montante sei depende ba avaliasaun aprofundadu.
Kona-ba proposta taxa entrada iha área turístika balun, nia hatete katak sidadaun sira iha liberdade atu hili fatin turístiku ne’ebé hakarak vizita. Nia fó ezemplu katak la’ós de’it kristu Rei mak iha Timor-Leste, maibé iha mós tasi no paisajen natural barak ne’ebé bele vizita gratuitamente.
“Sé ema hakarak ba kristu Rei, tuir regra tenke kontribui. Sé la hakarak, bele ba tasi seluk ka foho sira ne’ebé la presiza selu,” nia dehan.
Nia mós konsidera katak kontribuisaun ki’ik hosi sidadaun bele ajuda Governu hadi’a fasilidade públika no infraestrutura turístika iha fatin sira ne’ebé vizitadu.
“Hau hanoin la iha sala ida ita kontribui osan ki’ik ida atu hadi’a fasilidade no preserva fatin turístiku sira. Timor iha paisajen furak barak,” konklui Deputada Cedeliza Faria do Santos.
Jornalista Estajiaria :Eduarda Da Costa
