Media Tour Lori Jornalista Besik ba Komunidade iha Área Fronteira

banner 468x60

Dílipostnews.com, 30 Setembro 2026– Tour Jornalistiku neebe Inisiativa mai hosi Asosiansaun Tolu sai hanesan matadalan lori jornalista sira ba área fronteira no zona rural, atu hametin ligasaun entre mídia no komunidade, no mos permite jornalista sira haree no kompriende diretamente realidade no nesesidade komunidade iha área lokal.

Inisiativa tour Jornalistiku hosi Asosiasaun Jornalista Timor-Leste (AJTL), Uniaun Profisional Jornalista Timor-Leste (UPJTL), no Timor-Leste Press Uniaun (TLPU) parte ida hodi komemora loron Liberdade imprensa neebe mak sei realiza iha loron 16 fulan Outobru.

banner 336x280

Sekretáriu Estadu Komunikasaun Sosial (SEKOMS), Expedito Loro Dias Ximenes, hatete katak, liberdade imprensa fó benefísiu importante ba jornalista no povu Timor-Leste, tanba mídia iha papél importante atu habelar informasaun loos no hatudu realidade ne’ebé akontese iha komunidade.

Nia mos agradese ba Presidente Asosiasaun Jornalista Timor Lorosa’e (AJTL), Timor Leste Press Union (TLPU), Uniaun Profesional Jornalista Timor Leste (UPJTL) no membru sira hotu ba inisiativa Tour Media ba área rurál.

“Media hanesan ponte. Governu sei kontinua apoia programa sira hanesan ne’e, maski orsamentu ki’ik, no Governu garante sei la interven polítika editóriál,” dehan nia ba Jornalista sira hafoin Lansa Tour Jornalista iha Froteira, Kuarta ne’e.

Nia mós husu jornalista sira atu eduka públiku kona-ba uza Inteligénsia Artifisiál (AI) ho responsabilidade no étika, liu-liu ba foin-sa’e sira ne’ebé uza media sosiál.

Ligadu ho Komemorasaun Loron Liberdade Imprensa loron 16 fulan-Outubru, governante ne’e husu ba Konsellu Imprensa no Governu atu serbisu hamutuk.

Governu reafirma kompromisu atu garante liberdade espresaun no liberdade imprensa, livre hosi intervensaun podér polítiku no ekonómiku.

“Jornalista sira presiza kontinua besik komunidade, liuliu iha área fronteira no rural, atu bele rona diretamente komunidade nia esperiénsia, preokupasaun no nesesidade, no lori sira-nia lian ba públiku.”Tenik nia

Nia hatete, Governu fó atensaun ba komunikasaun no jornalizmu, tanba jornalista sira sai ponte entre governu, instituisaun no komunidade.

“Liu husi media, informasaun kona-ba realidade povu bele to’o ba públiku, enkuantu preokupasaun komunidade bele hetan atensaun husi instituisaun kompetente,tanba nee ita apoiamentu governu la signifika intervensaun ba politika editorial,”Katak nia

Nia afirma katak, Governu sei respeita independénsia media, liberdade jornalista sira no prinsipiu jornalístiku, inklui independénsia no imparsiálidade.

Nia husu atu media sosial no plataforma dijitál uza ho responsabilidade, ho informasaun bazeia ba faktu, verifikasaun no ética jornalístika.

Iha fatin hanesan, Prezidente Asosiasaun Jornalista Timor-Leste, Zevonia Vieira, hatete, atividade nee Asosiasaun sira sei lori jornalista sira ba Bobonaru no Oe-Cosse, enkuantu TLPU sei ba Covalima. Atividade ne’e sei fó atensaun ba preokupasaun komunidade iha fronteira, inklui edukasaun, saúde no asesu ba servisu públiku.

“AJTL mós sei hala’o sosializasaun kona-ba seguransa dijitál ba joven no estudante sira, liuliu iha Munisípiu Bobonaru. Atividade Media Tour ne’e sei realiza nu’udar parte husi komemorasaun Loron Liberdade Imprensa, ne’ebé sei komemora iha 16 Outubru hodi kontinua Promove Liberdade Imprensa iha Timor-Leste.”dehan nia

Nia dehan, iha loron Komemorasaun ida nee Asosiasaun Sira Lori Jornalista sira ba area rural atu fo sai informasaun sira neebe maka dalabarak Povu seidauk hetan espasu atu koalia, no sira nia prekupasaun sira neebe mak sira hasoru tantu iha asuntu area Fronteira, Edukasaun, Saude no asesu informasaun iha area rural sira.

“Objetivu atu ita ajuda jornalista sira kobre sai informasaun sira neebe mak povu sira hasoru sei mukit ba iha setor oi-oin, nunee jornalista kontribui liuhosi notisia no fo hanoin ba estadu atu buka solusaun hodi responde ba prekupasaun ne’ebe mak komunidade sira hasoru,”Tenik

Nia afirma atividade hosi AJTL sei iha rua, ida mak media tour no ida mak sei halo sosializasaun konaba importansia hosi literasia dijital ba iha joven no eskola sira iha Munisipiu Bobonaro atu hare konaba importansia oinsa mak asegura seguransa dijital nomos oinsa kombate misinformasaun ka informasaun falsu iha era dijital.

AJTL ho nia membru Jornalista nain 14, kompostu hosi Media, Online, Televizaun No Jornal inklui Radiu.

Nunee, Prezidente Uniaun Profisional Jornalista Timor-Leste (UPJTL), Horacio Babo, hatete, organizasaun jornalista haat sei hala’o Media Tour ho apoiu Governu.

Nia Informa, Organizasaun hirak-ne’e inklui Profisional Jornalista Timor-Leste (UPJTL), Asosiasaun Jornalis Timor-Leste (AJTL), Timor-Leste Press Uniaun no (TLPU) Atividade sei konsentra liuliu iha área fronteira no rural.

“Media Tour sei aproxima jornalista sira ho komunidade, liuliu iha área rural, atu haree diretamente situasaun no realidade lokal. Durante ita nia atividade, jornalista sei halo visita, interasaun no sosializasaun ho lideransa lokal, funsionáriu públiku no komunidade,”nia koalia.

Nia hatutan,Jornalista sira mós sei halo cobertura kona-ba atividade sosial, dezenvolvimentu no dezafiu komunidade sira enfrenta iha área rural.

“Ami hakarak média sai ponte entre komunidade, instituisaun públika no públiku,”nia hatutan.

Nia deklara, atividade ne’e sei inklui jornalista hamutuk 10 hosi média online, imprensa, televizaun no rádio, atu garante cobertura liuhusi plataforma oioin.

“Ita nia Jornalista sira sei mós sosializa literasia média ba komunidade no funsionáriu, inklui asesu, uza no fahe informasaun ho responsabilidade,”hakotu nia.

Jornalista: Anita Silva

banner 336x280

Leave a Reply

Your email address will not be published. Required fields are marked *