Dílipost.com, Loron 08 Maiu 2026,- Kampu futeból iha postu administrativu Ossú, munisípiu Viqueque, atualmente enfrenta problema tanba kampu ne’e nakonu ho tahu dodok durante realizasaun jogu komunitáriu 20 de Maiu nian, Kondisaun ne’e halo difikuldade ba jogadór sira atu hala’o partida ho normal no afeta mós kualidade kompetisaun ne’ebé lao hela.
Observasaun direta husi jornalista Dílipost.com iha kampu futeból Ossú hatudu katak durante jogu entre ekipa Waidora hasoru wuasupa United, jogadór sira la konsege lori bola ho di’ak tanba bola belik de’it iha tahu laran. Iha balu momentu, bola la rol ba oin no para iha tahu laran, halo jogu la’o la normal, la hanesan kampu maran.
Kondisaun kampu ne’e mos halo jogadór balu monu no susar atu kontrola bola. Aprezentasaun jogu la’o ho ritmo ne’ebé lenta tanba jogador sira tenke kuidadu bainhira halai no pasa bola iha area ne’ebé tahu kle’an. Maske nune’e, ekipa rua kontinua hatudu espiritu desportivu no esforsu atu remata jogu to’o hotu.
Tuir informasaun ne’ebé hetan husi komunidade sira, durante fulan Abril to’o Maiu udan tun nafatin iha area Ossú, Udan boot ne’e halo bee iha kampu laran. kampu nian mos sai soft no tahu dodok barak iha parte balu kampu nian.
Komisaun organizadora hateten katak maske kampu ne’e la iha kondisaun di’ak, sira kontinua realiza kompetisaun iha fatin refere tanba kampu alternativa seluk seidauk apropriadu. Kampu ida iha area Uaibua iha duni, maibé kondisaun mos la di’ak atu simu kompetisaun komunitáriu ne’ebé involve klube balu.
Jogu komunitáriu 20 de Maiu ne’e realiza loron ida dala rua ho partisipasaun klube ha’at husi aldeia no suku iha area Ossú. Kompetisaun ne’e objetivu atu hametin unidade komunidade, promove juventude nia talentu iha area desportu no komemora loron istoriku independénsia Timor-Leste.
Komunidade no adektus futeból balu espera katak autoridade relevante bele haree problema kampu ne’e no buka solusaun atu hadi’a infraestrutura desportiva iha Ossú. Sira fiar katak kampu ne’ebé di’ak sei ajuda juventude sira atu dezenvolve talentu no hala’o atividade desportiva ho seguru no konfortável liu tan.
Jornalista : Azacsi Quintão
