DiliPost.com- Estudante husi universidade UNDIL. UNTL, UNITAL no UNPAZ ne’ebé hamahan an iha asosiasaun, Estudante Universidade Timor Lorosa’e (EUTL), fo ultimatu ba Parlamentu Nasional (PN)
hapar Sosa Viatura, bainhira reprezentante kontinua sosa sira sei mobiliza halo asaun pasifika hasoru.
Afirmasaun ne’e EUTL hato’o liu husi konferensia imprensa iha resintu kampus UNTL sentrál Kuarta feira (03/09) ne’e.
Relasiona ho politika PN nian ne’ebé aprova orsamentu privativu ho montante milaun $4.2 hodi sosa kareta unidade 65 ba deputadu sira.
Portavos estudante universidade timor-lorosa’e, Natalizio Nunes, hatete hanesan loron rua liu ba, universidade hotu-hotu hatur ona sira nia pozisaun, katak PN tenke kansela orsamentu privatibu ne’ebé atu sosa kareta prado.
Nune’e liu husi pozisaun sira ne’e, ohin iha ona estudante universidade timor lorosa’e, reafirma tan nia pozisaun dala ida, atu deputadu sira kansela ona orsamentu privatibu ba sosa kareta prado.
“Aban ita sei hatama, ita nia petisaun ba parlamentu nasionál,atu ita bele halo audensia ho sira, no ita sei haruka mos karta ba polisia nasionál timor-leste atu halo asaun pasifiku, bainhira la iha rezultadu,” informa nia ba jornalista.
Tan ne’e, nia afirma husi petisaun refere, atu husu ba parlamentu atu hapara ona politika sosa kareta prado foun ba deputadu na’in 65, hodi aloka fali osan refere ba setór estratejia sira seluk.
“Ami mos husu atu hasai direitu regalia sira ne’ebé mak parlamentu nasionál liu husi deputadu sira hatur ona iha lei, hanesan osan ba manutensaun, alojamentu, laptop, tratamentu saude, osan pulsa no seluk tan ne’ebe privileziu tebes ba deputadu sira iha parlamentu nasional,” tenik Porta vos ne’e.
Aleinde ne’e estudante sira mos husu atu altera lei nú 1/2006, ko’alia kona-ba manifestasaun liu-liu iha klaúzula ida kona-ba restrisaun 100 (cem) metros, tanba ida ne’e iha tendensia atu hamate demokrasia.
Tuir sira lei refere ba la nesesariu, la adekuadu no apropriadu iha estadu demokratiku, no husu atu hasai ona direitu regalia sira ba deputadu sira.
“Ami mos husu atu hasai ona lei pensaun vitalisia, ne’ebé mak fo de’it prejuizu ba grupu balun,ida ne’e ita lamemta tebes” dehan nia.
Entretantu husi petisaun refere sira fiar katak, sei kansela orsamentu privativu, antes tama ba konkursu publiku hodi sosa kareta.(Octa)
