DiliPost.com- Inspesaun gerál do Jogo (IGJ) ne’ebe tutela iha Ministériu Turizmu no Ambiente, durante ne’e husi aktividade inspeksaun ne’ebé sira halo konsege kuntribui ona reseitas hamutuk $9,898,401.14 ba kofre estadu.
Inspektór Jerál do Jogo Anival Carvalho Martins dehan, reseitas hirak ne’e rekolla husi empreza sira ne’ebé rejistu hanesan, Lotaria, Dragon, Kiss, Rudal, Amizade, Timor-poll, Toto-Fitun, no iha makina nian mak MDG Holding, Timor Holding, Unlong Unipesoal, LDA no jogu online iha hitu (7) mak rejistu hodi hala’o sira nia aktividade Timor-Leste.
“Husi jogu 17 ne’ebé rejistu ne’e mak ita rekolla ona reseitas hamutuk $9,898,401.14 ba kofre estadu,” dehan Inspektór Jerál do Jogo Anival Carvalho Martins ba jornalista iha nia kna’ar fatin IGJ Bebora Tersa feira (3/09) ne’e.
Nia hatutan, reseitas hirak ne’e rekolla hahu husi 2023 iha $3,741,660.30 no iha tinan 2024 iha $3,917,821.91 no iha tinan 2025 nian hahu husi fulan Jeneiru to’o Jullu iha $2,238,918.93, no total ikus $9,898,401.14.
“Ba ami ami sei servisu makas tuir rekursu no kapasidade naton ne’ebé ami iha hodi hasa’e tan montante resitas ba kofre estadu,” dehan Martins
Nia mos relata kona ba servisu kontrolu ne’ebé durante ne’e sira halo no manual de’it, maibé ba oin sei utiliza sistema kontrolu dijitál.
” Agora ita sei kordena no parseiru internasionál sira hodi fasilita formasaun ba ita nia funsionáriu sira hodi bele hasa’e sira nia eskil hodi halo kontrolu ba aktividade jogu ne’ebé dadaun ne’e la’o hela,” subliña nia.
Enkuantu nia hatete, totál funsionáriu ne’ebé mak dadaun ne’e halo servisu iha IGJ hamutuk 50.(ercia)
