Prezidente Filipinas Husu Líder Asean Hametin Kooperasaun Atu Hatan Dezafiu Rejionál

banner 468x60

Dílipost.com, 16 Novembru 2026 — Prezidente Filipinas, Ferdinand R. Marcos Jr., husu bá lider nasaun membru ASEAN sira atu hametin kooperasaun no solidariedade rejionál hodi enfrenta dezafiu komún sira, inklui krime transnasionál, tráfiku umanu, krime sibernétiku no fraude online.

Prezidente Marcos hato’o apelu ne’e iha nia diskursu abertura 49.ª Simeira ASEAN, ne’ebé hala’o iha Philippine International Convention Center (PICC), Pasay City, Manila, iha Domingu, 15 Novembru 2026.

banner 336x280

Nia afirma katak enkontru líder ASEAN no parseiru esternu sira durante loron tolu sei sai oportunidade importante atu foti desizaun ne’ebé bele ajuda organizasaun rejionál ne’e responde bá dezafiu ohin loron, aproveita oportunidade futuru no prepara rejiaun bá jerasaun tuirmai.

“Durante loron sira tuirmai, hamutuk ho parseiru esternu sira, desizaun ne’ebé ita foti sei determina oinsá ASEAN responde bá dezafiu ohin loron, aproveita oportunidade aban-bainrua no prepara rejiaun bá jerasaun sira tuirmai,” Marcos dehan iha nia diskursu.

Enfatiza mós katak, nesesidade atu hametin kooperasaun marítima, liuliu iha situasaun ne’ebé rejiaun enfrenta ameasa no dezafiu seguransa transnasionál.

Marcos refere mós bá símbolu Balangay, ró tradisionál Filipinas, ne’ebé reprezenta unidade, konfiansa, kapasidade atu adapta bá mudansa no kompromisu hamutuk hodi atinji objetivu komún.

Nia esplika katak, hanesan Balangay ne’ebé presiza ema hotu iha ró atu halo viajen hamutuk, ASEAN mós presiza nasaun membru sira nia konfiansa no kompromisu atu avansa bá futuru komún.

Simeira ASEAN bá 49 ne’e hala’o ho tema “Navigating Our Future, Together” ka “Naviga Hamutuk bá Ita-nia Futuru”, ho Filipinas nu’udár nasaun ne’ebé kaer prezidénsia organizasaun rejionál ne’e bá tinan 2026.

Durante serimónia abertura, mós aprezenta símbolu foun ASEAN no hala’o aprezentasaun bandeira no sertifikadu ASEAN ho formatu atualizadu.

Iha okaziaun ne’e, Hla Hla Aung hosi Mianmar simu Prémiu ASEAN 2026, tanba nia kontribuisaun iha área peskiza, jestaun no preparasaun bá dezastre.

49.ª Simeira ASEAN no Simeira Relasionada hala’o hosi 15 to’o 17 Novembru 2026, iha Manila, ho partisipasaun lider nasaun membru ASEAN no parseiru sira, hodi diskute asuntu estratéjiku sira kona-bá kooperasaun ekonómika, seguransa, estabilidade no dezenvolvimentu rejionál.

Timor-Leste, nu’udár membru ASEAN ba-11, partisipa iha enkontru importante ne’e liuhosi Primeiru-Ministru Kay Rala Xanana Gusmão, hamutuk ho lider nasaun membru ASEAN sira seluk.

Jornalista : Dílipost.com

banner 336x280

Leave a Reply

Your email address will not be published. Required fields are marked *