Dílipost.com,Xina 24 Julli 2026 – Ajénsia Notísia Vídeo CCTV+ hala’o sesaun interkámbiu ho delegasaun mídia Timor-Leste iha loron 24 fulan Jullu, hodi diskute oportunidade atu hametin kooperasaun iha área komunikasaun no troka konteúdu. Enkontru ne’e hala’o tuir mekanizmu Global South Media Partners, ne’ebé promove kolaborasaun entre organizasaun mídia husi nasaun sira iha Global South.
Eventu ne’e halibur jornalista reprezentante na’in 24 husi organizasaun mídia 12 iha Timor-Leste, inklui RTTL, TATOLI, SMNews, SECOMS, Lafaek News, Dili Post, Televizaun Edukasaun Timor-Leste, Jornal Independente, GMN TV, SapNews, Timor Post no Suara Timor Lorosa’e.
Iha enkontru ne’e, Xefe Delegasaun Mídia Timor-Leste no reprezentante SECOMS, Augusto Sarmento dos Reis, hato’o apresiasaun ba CCTV+ tanba simu delegasaun Timor-Leste no fahe esperiénsia kona-ba dezenvolvimentu mídia no komunikasaun internasionál.
” Lori delegasaun mídia Timor-Leste nia naran, ami hato’o ami nia apresiasaun sinseru ba CCTV+ tanba simu ami iha ne’e. Vizita ida-ne’e reprezenta pasu importante ida atu hametin liután komunikasaun no kooperasaun entre organizasaun mídia Timor-Leste no Xina,” dehan Augusto Sarmento iha CCTV+.
Nia hatete katak nu’udar nasaun ida ne’ebé sei dezenvolve nia setór mídia, Timor-Leste kontinua investe atu hasa’e profisionalizmu, kredibilidade no inovasaun iha área komunikasaun. Tanba ne’e, nia konsidera CCTV+ hanesan parseiru importante ida atu fahe koñesimentu no esperiénsia.
” Ami rekoñese progresu notável ne’ebé CCTV+ alkansa iha área mídia no komunikasaun internasionál. Vizita ida-ne’e fó oportunidade boot ba ami atu aprende, troka esperiénsia no esplora área sira ne’ebé bele kolabora hamutuk iha futuru,” nia dehan.
Durante diskusaun, Augusto Sarmento subliña katak kooperasaun entre mídia husi nasaun Global South importante atu hametin kapasidade institusionál no promove komprensaun mútua entre povu sira.
” Ami fiar katak kooperasaun Sul ba Sul iha setor mídia importante tebes atu harii kapasidade mútua no fahe perspetiva husi ita-nia rasik. Ita presiza konta ita-nia istória ho ita-nia lian rasik ba audiénsia internasionál,” nia hatutan.
Nia mós propoin área tolu atu bele sai prioridade ba kooperasaun entre organizasaun mídia Timor-Leste no CCTV+, mak programa formasaun ba jornalista no profisionál mídia, vizita no interkámbiu regular entre instituisaun rua, no dezenvolvimentu produsaun konteúdu konjuntu ne’ebé reflete kultura no realidade dezenvolvimentu husi nasaun rua.
” Ami hakarak haree programa formasaun ba jornalista sira, troka vizita entre instituisaun mídia no produsaun konteúdu konjuntu ne’ebé bele hato’o ita-nia kultura no dezenvolvimentu ba mundu. Inisiativa sira hanesan ne’e sei hametin kooperasaun no fó benefísiu ba parte rua,” dehan Augusto.
Nia akresenta katak mídia iha responsabilidade boot atu forma komprensaun públiku, promove transparénsia no fó kontribuisaun ba dezenvolvimentu nasionál.
” Liuhosi serbisu hamutuk, ita bele kontribui ba ambiente informasaun globál ida ne’ebé ekilibradu no inkluzivu liután. Ami hein katak kooperasaun entre CCTV+ no organizasaun mídia Timor-Leste sei kontinua forte iha futuru,” nia afirma.
Xefe delegasaun mídia Timor-Leste reafirma nia kompromisu atu hametin kooperasaun ho organizasaun mídia husi Xina no nasaun sira seluk iha Global South liuhosi interkámbiu profisionál, fahe konteúdu no konta istória hamutuk, atu kontribui ba dezenvolvimentu komunikasaun internasionál ida ne’ebé ekilibradu, inkluzivu no fó benefísiu ba povu hotu.
Jornalisra : Azacsi Quintão
