DiliPost.com – Governu ne’ebe lidera husi Primeiru Ministru, Kay Rala Xanana Gusmão apresia ho atuasaun Polisia Nasional Timor Leste (PNTL) ne’ebe halao operasaun kombate atividade jogu ilegal sira iha rai laran.
Ligadu ho atuasaun PNTL ne’ebe ho profesionalizmu hodi kontinua buka tuir nafatin atividade ilegal, inklui krime scamming (burla eletrónika no fraude online) ne’ebé aumenta risku ba seguransa públika, ekonomia nasionál no reputasaun Timor-Leste iha nivel internasionál.
Nune’e, liu husi Konferénsia Impresa Kuarta feira (15/07) ne’e, Sekretariu Estadu Komunikasaun Sosial (SEKOMS), Expedito Loro Dias Ximenes haktuir katak iha 27 Agostu 2025, ekipa konjunta ne’ebé lidera husi PCIC asegura ema hamutuk nain 10 iha Hotel De Upun, Oecusse. Husi total ne’e, Tribunál determina Peizaun Preventiva ba suspeitu nain 6.
Iha 13 Novembru 2025, autoridade asegura sidadaun Xina nain 7 iha Lotaria Dragon, no Governu taka kedas atividade Lotaria Dragon. Iha prosesu judisiál, Tribunál aplika Ternu Identidade no Rezidénsia (TIR), Aprezentasaun Periódika (AP) no Medida Kauzaun.
Nunee mós, PNTL asegura no detein suspeitu nain 11 iha Jita Plaza no Loja Kolmera. Ba kazu ida-ne’e, Tribunál aplika TIR, AP no Medida Kauzaun.
Entretantu 26 Juñu 2026, PNTL detein tan suspeitu hamutuk nain 61 iha operasaun kontra online scamming iha Tibar. Husi total ne’e, Tribunál aplika Peizaun Preventiva ba arguidu ida ho inisiál D, enkuantu arguidu restante nain 60 simu TIR, AP no Proibisaun Ausénsia. No iha 8 Jullu 2026, PCIC detein ema hamutuk nain 110 liga ba kazu online scamming, no husi ne’e prosesu kriminal avansa ba ema nain 96. Iha loron hanesan, Polísia detein tan suspeitu hamutuk nain 53, kompostu husi Manleuana nain 29 no Metiaut nain 24. Prosesu judisiál ba kazu hirak-ne’e remata ona.
Aliende ne’e, nia dehan autoridade hala’o operasaun iha Ulmera, Likisá, no Kampung Baru, Komoro, asegura suspeitu hamutuk nain 90, kompostu husi sidadaun Indonézia nain 76 no sidadaun Xina nain 14. To’o agora, prosesu identifikasaun no investigasaun sei la’o hela.
Governate ne’e hatutan durante operasaun sira hotu, PNTL no PCIC asegura ema hamutuk nain 342 ne’ebé suspeitu envolve iha atividade online scamming no call center ilegal. To’o oras ne’e, arguidu sira hetan medida koasaun Peizaun Preventiva, sujeitu ba medida koasaun seluk tuir desizaun Tribunál.
“Governu reafirma katak Timor-Leste sei la tolera utilizasaun territóriu nasional ba atividade kriminál transnasional, inklui fraude eletrónika, burla online, lavagem osan, tráfiku ema, ka forma seluk husi krine organizadu neʼebé viola lei no ameasa soberania no interese nasional,” tenik Sekretariu Estadu Expedito, iha Palasiu Governu.
Tuir nia, operasaun ne’ebé PNTL hala’o hatudu kompromisu forte instituisaun seguransa sira atu garante aplikasaun lei ho rigor, respeita direitus umanus no prinsipiu Estadu de Direitu Demokrátiku. Governu enkoraja PNTL atu kontinua servisu hamutuk ho Ministériu Públiku, autoridade judisiál, Servisu Migrasaun, Unidade Intelijensia Finanseira no parseiru internasionál sira hodi investiga no lori responsavel sira ba prosesu judisiál tuir lei.
Governu mós husu sidadaun hotu-hotu atu kolabora ho autoridade sira, liuhusi fó informasaun kona-ba atividade suspeita, no la envolve an iha atividade ne’ebé bele prejudika komunidade no nasaun. Kolaborasaun entre povu no autoridade mak elementu importante atu hametin seguransa no ukun diak.
Relasiona ho sidadaun estranjeiru sira ne’ebé hela no servisu iha Timor-Leste, Governu reafirma katak ema hotu-hotu ne’ebé kumpri lei sei simu protesaun no tratamentu hanesan tuir Konstituisaun no lei vigór. Maibé, ba ema ne’ebé utiliza Timor-Leste nu’udar fatinatu halo atividade ilegal, Governu sei foti medida legal rigorozu tuir lei nasional no obrigasaun internasionál sira.
Governu kontinua komprometidu atu fortalese kapasidade instituisaun seguransa no justisa, hasa’e kooperasaun internasionál no dezenvolve mekanizmu preventivu atu Timor-Leste sai nasaun ida ne’ebé seguru, estável no livre husi atividade kriminál organizadu.
Ne’e duni, nia dehan SEKOMS lori Governu nia naran konvida meius komunikasaun sosiál no komunidade tomak atu fó apoiu ba esforsu autoridade sira, liuhusi dissemina informasaun loos no evita espalla informasaun ne’ebé seidauk konfirmadu, atu nune’e bele mantein konfiansa públika no estabilidade nasional.(Lusia)
