Dílipost.com, Loron 20 Juñu 2026,- Korpu da Pás ho haksolok simu Voluntáriu foun na’in ualu mai Timor-Leste, Voluntáriu sira ne’e sei servisu iha área edukasaun no dezenvolvimentu ekonómiku komunitáriu, fó apóiu ba parseiru lokál no komunidade sira enkuantu hametin amizade ne’ebé hari’i entre povu Timor-Leste no Estadus Unidus.
Molok hahú sira-nia knaar, Voluntáriu sira sei partisipa iha Treinamentu Pré-Servisu (PST) intensivu semana 11 nian. PST fornese instrusaun ba lian Tetum, formasaun entre kultura, preparasaun ba saúde no seguransa, no formasaun téknika ne’ebé dezeña atu suporta Voluntáriu sira hodi kompleta sira-nia serbisu Voluntáriu ho susesu.
Durante PST, sira sei hela ho família uma-na’in Timor-oan sira no hola parte ativu iha atividade no moris komunidade lokál sira nian.
Depoizde kompleta PST, Voluntáriu sira sei simu pose no destaka ba komunidade oioin iha Timor-Leste. Voluntáriu Edukasaun sira sei serbisu hamutuk ho profesór Timoroan sira hodi hametin instrusaun lian Inglés iha eskola pre-sekundária no sekundária.
Voluntáriu Dezenvolvimentu Ekonómiku Komunitáriu sira sei halo parseria ho organizasaun lokál sira, sentru formasaun sira, kooperativa sira, no grupu komunidade sira hodi apoia dezenvolvimentu forsa traballu, empreendedorizmu, literásia finanseira, no kapasitasaun organizasionál.
Dezde fila mai Timor-Leste iha tinan 2003, Voluntáriu Korpu da Pás serbisu besik ho komunidade sira hodi apoia prioridade sira-ne’ebé identifika lokalmente enkuantu kontinua promove komprensaun mútua no interkámbiu kulturál.
Grupu foun ida-ne’e nia destakamentu mai Timor-Leste kontinua Korpu da Pás nia kompromisu hodi apoia objetivu dezenvolvimentu Timor-Leste nian liuhosi parseria, serbisu, no amizade.
Jornalista : Ercia Freitas
