DILI Post-Governu Repúblika Demokrátika Timor-Leste (RDTL) no Reinu Tailandia, asina ona akordu kona-ba ijensaun vistu turista ba passaporte komún ba ordináriu entre rai-rua ne’e ba periódu loron 30 nia laran.
Akordu ne’e asina husi Ministru Negósius Estranjeirus no Kooperasaun (MNEK) Timor-Leste, Bendito dos Santos Freitas ho omólogu Ministru Negósius Estranjeirus husi Reinu Tailandia, Maris Sangiamponsa, iha okaziaun vizita ofisiál Ministru Bendito nian ba Thailandia hodi responde ba konvite ofisiál husi Ministru Maris Sangiamponsa.
“Akordu ne’ebé asina ona ho Governu Thailandia, liu husi Ministériu Negósius Estranjeirus nasaun rua ne’e nian, konkorda tiha ona ba ijensaun de vistus ba portadores passaporte komún ne’ebé sidadaun Timor-Leste bele iha periódu 30 dias bele mai iha Thailandia sem vistu, atu bele passa turízmu, halo kompras, edukasaun no áreas sira seluk,” informa Ministru Bendito.
Ministru Bendito Freitas mós husu Ministériu Interiór liu-liu Servisu Imigrasaun katak, ho akordu kona-ba ijensaun vistu turista ba passaporte komún ne’e, sidadaun Thailandés ne’ebé hakarak vizita Timor sem vistus durante loron 30 nia laran.
Entretantu, ho asinatura ba akordu refere, iha prazu loron 30 nia laran, no sura husi loron selebrasaun akordu refere, Parlamentu Nasional husi nasaun rua presiza halo ratifikasaun hafoin bele hahú ninia implementasaun.
Antes ne’e, nasaun rua aplika ona vistu livre ba passaporte servisu no diplomástiku nian ba sidadaun Timor-Leste ho Thailandés ne’ebé halo passajen vise-versa.
Jornalista: Javelino Da Silva
