DILI Post-Konstrusaun estrada protokolu iha área Tasi-Tolu atinje ona 50% no Governu kontinua aselera atu bele konklui iha fulan Agostu molok vizita Papa Francisco mai Timor-Leste (TL), iha fulan Setembru tinan ne’e.
“Mai hato’o relatóriu kona-bá preparativu sira ligadu ho vizita Papa Francisco. Preparasaun kuaze 50% konklui tanba servisu dala-ruma to’o kalan atu aselera. Espera fim Agostu bele konklui ona, hanesan estrada iha Tasi-tolu inklui estrada sira ne’ebé durante ne’e udan sobu iha Dili laran,” Ministru Obras Públikas (MOP), Samuel Marçal atualiza progresu konstrusaun ne’e bá Primeiru-Ministru (PM), Kay Rala Xanana Gusmão iha Palásiu Governu, sesta (21/06/2024).
Alende nee mos Ministru Samuel Marçal mós klarifika kona-ba fatin sira ne’ebé foin lalais hetan despezu administrativu hosi Sekretária Estadu Asuntu Toponímia Organizasaun Urbana (SEATOU), liu-liu iha área Bidau nian, daudaun ne’e ekipa halo hela mobilizasaun material atu hahú konstrusaun.
MOP Samuel Marçal mós ko’alia ona ho SEATOU atu molok sobu fatin sira iha área tasi-ibun no fatin sira seluk presiza halo koordenasaun didi’ak ho tékniku MOP nian atu prepara uluk dezeñu, nune’e sobu hotu avansa kedan ho konstrusaun.
Jornalista: Javelino Da Silva
