DILI Post-Ministru Negósius Estranjeirus no Kooperasaun (MNEK), Bendito dos Santos Freitas, reprezenta estadu Timor-Leste asina sesta-feira semana kotuk ne’e ,Memorandu Entendimentu ho Governu Mosambike, hodi estabelese kooperasaun iha área importante tolu inklui iha esplorasaun ba mina no gás (Hidrokarbonetus no Mina).
Akordu ne’e asina ho Ministra Negósius Estranjeirus no Kooperasaun Mosambike, Verônia Mocamo, hafoin remata enkontru bilateral entre Prezidente Repúblika Timor-Leste, José Ramos-Horta ho delegasaun ho Xefe Estadu Mosambike, Filipe Jacinto Nyusi, iha Palásiu Prezidensiál, iha iha ámbitu vizita ofisiál Prezidente Repúblika, José Ramos-Horta nian ba refere.
“Memorandu entendimentu tolu ne’e, primeiru kona-ba estabelesimentu mekanizmu permanente ba konsulta polítika diplomátika, ida-ne’e téknikamente atu bele halo diskusaun. Ida tan mak memorandu entendimentu ba ensinu superior, siénsia no teknolojia nian, ida fali memorandu entendimentu ba esplorasaun mina no hidrokarbonetus,” esplika Ministru Bendito.
Governante ne’e haktuir tan, Prezidente Repúblika Mosambike mós husu Timor-Leste atu fahe esperiénsia ba sira kona-ba jestaun fundu soberanu ka fundu petrolíferu.
“Sira husi Mosambike mós husu atu bele haree esperiénsia ita-nia kona-ba jestaun fundu soberanu. Ita kona-ba indústria estrativas ne’e avandu ona, tanba ne’e mak sira hein husi ita atu aprende ba setór ida-ne’e, espera katak, ekipa téknika bele mai par aserta,” tenik Xefe Diplomasia Timor-Leste ne’e.
Assuntu seluk ne’ebé ko’alia mós mak iha área edukasaun, saúde, agrikultura, dezenvolvimentu kapital umanu inklui kooperasaun multilateral iha nível Nasoens Unidas no organizmu multilateral sira seluk ne’ebé Timor-Leste ho Mosambike bele tulun malu.
Prezidente Ramos-Horta mós husu Mosambike ne’ebé hanesan nasaun dahat iha organizasaun Cumunidade dos Países da Línua Portuguesa (CPLP) alende ne’e Portugal, Brazil no Angola, inklui mós nasaun membru CPLP sira seluk, atu loke harii Embaixada iha Timor-Leste, nune’e bele konsolida liután relasaun no kooperasaun entre estadu membru sira.
Sorumutuk ne’e, Xefe Estadu, José Ramos-Horta, akompañadu husi Ministru Negósius Estrajeirus no Kooperasaun, Bendito Freitas, Embaixadór Timor-Leste ba Mosambike, Luís Miguel de Sousa Siqueira no seluk tan.
Jornalista: Javelino Da Silva
