DILI Post-Empreza aviasaun hosi nasaun Indonézia ho naran PT. Indonesia AirAsia, aprezenta ona interese bá Primeiru-Ministru (PM), Kay Rala Xanana Gusmão, hakarak atu espande área operasaun hosi Denpasar-Bali, Repúblika Indonézia mai Dili, Timor-Leste (TL).
Planu ne’ebé empreza aprezenta bá Xefe Governu maka, hakarak atu hahú voo dahuluk iha inísiu fulan setembru tinan 2024.
“Ami mai hasoru-malu ho Primeiru-Ministru hodi aprezenta ami-nia interese hakarak atu halu’an ami nia área operasaun. Iha ami-nia planu, hakarak semo hosi Denpasar mai Dili iha inísiu fulan setembru,” Reprezentante AirAsia ho naran Edwin, hateten hafoin hamutuk ho delegasaun hasoru-malu ho Priemiru-Ministru iha Palásiu Governu, segunda (08/07/2024).
Empreza aviasaun ne’e mós iha esperansa boot bá prosesu hotu-hotu sei la’o ho lalais atu bele realiza duni voo dahuluk iha inísiu fulan setembru, nune’e bele tula mós pasajeiru sira hosi Ázia ne’ebé hakarak atu partisipa hodi asiste vizita Papa Francisco mai Timor-Leste.
Xefe Governu rekomenda bá PT Indonesia AirAsia atu koordena ho Ministériu Transporte no Komunikasaun (MTK) Timor-Leste atu bele trata asuntu ne’e, nune’e bele realiza planu espansaun operasaun mai Díli.
AirAsia hanesan kompañia aérea ho servisu kompletu iha tinan 1993 no hahú operasaun iha loron 18 fulan-novembru tinan 1996 to’o ohin loron.
Jornalista: Javelino Da Silva
