DILI Post News, 03 Dezembro 2025 -Governo Republika Demokratika Timor-Leste(RDTL) espresa nia solidariedade klean ba povu no Governu Indonezia, Sri Lanka, Tailandia no Malazia, no mos nasaun sudeste Aziatiku sira seluk neebe afetadu husi inundasaun no rai-halai, iha loron hirak ikus nee.
Dezastre natural nebe akontese iha nasaun Azia hirak nee halo ema liu rihun ida mate, ema atus ba atus lakon no ema rihun atus ba atus dezlokadu.
“Inundasaun no rai-halai neebe afeta Sudeste Aziatiku sai hanesan epizodiu ida ne’ebé aat liu iha tinan hirak ikus nee. Operasaun salvamentu no tulun nian kontinua iha rejiaun oioin, enkuantu nafatin buka ema sira neebe lakon,” haktuir nota komunikadu ne’ebe DP asesu husi governu, Kuarta, (03/12/2025)
Dezastre natural neebe akontese iha Indonezia, liuliu illa Sumatra, rejista numeru aas liu husi vitima sira, ho mate no lakon atus ba atus, infraestrutura sira neebe rahun no komunidade sira neebe izoladu. Iha Sri Lanka, Tailandia no Malázia, autoridade sira deklara ona estadu emerjensia iha area oioin, iha neebe ema milloins hetan prejuízu makaas, rihun ba rihun iha abrigu temporáriu sira no susar atu hetan asesu ba servisu esensial sira, edukasaun no meius subsistensia.
Sorin seluk, Primeiru-Ministru, Kay Rala Xanana Gusmão lori povu Timor Leste nia naran hatoo sentidu soliariedade ba Governu Indonezia, Malazia,Sri Lanka no Tailandia ba dezastre natural neebe akontese iha nasaun hirak nee.
“hodi Governu no povu Timor-Leste nia naran hatoo nia “tristeza no solidariedade kle’’an ba povu Indonezia, Malazia, Sri Lanka no Tailandia, neebe terus tanba impaktu husi tempestade tropikal estremu foin lalais neebe hamosu inundasaun no rai-halai makaas tebes,” hatete PM Xanana
Xefe Governu nee mos hateten katak lakon moris no deslokasaun ema, trajiku no triste teb-tebes.
“Ami laran taridu tebes ho eskala trajédia ida-ne’e no senariu sira kona-ba inundasaun no deslokasaun ema, neebe hamosu preokupasaun boot iha Timor-Leste,” xefe governo dehan.
Aliende nee Portavós Governu no Ministru Prezidénsia Konsellu Ministrus, Agio Pereira, afirma katak iha tempu susar nee governu Timor Leste komprometidu atu kontinua tulun komunidade sira neebe afetada dezastre natural nee.
Governu Timor-Leste reafirma ninia konfiansa katak ho forsa no reziliensia husi sira-nia povu, nasaun afeitadu hirak nee sei rekupera no harii filafali. Timor-Leste hamriik iha solidariedade ho ita-nia bin-alin no maun-alin sira iha rejiaun aziátiku iha tempu susar no rekuperasaun ida-nee nia laran.
JORNALISTA : DILI POST
