DILI Post-Governu Repúblika Demokrátika Timor-Leste (RDTL) ho Repúblika Angola asina segunda-feira foin lalais ne’e,akordu kooperasaun hodi fó vístu ba titulares passaporte diplomátika no passaporte servisu nian entre nasaun rua.
Akordu ne’e asina husi Ministru Negósius Estranjeirus no Kooperasaun, Bendito dos Santos Freitas ho nia omólogu Ministru Relasaun Exterior Repúblika Angola, Téte António, hafoin remata enkontru tete-a-tete Prezidente Repúblika, José Ramos-Horta ho nia omólogu Prezidente Angola, João Lourenço, iha Palásiu Prezidensiál Luanda.
Akordu izensaun vistu ba titulares passaporte diplomátiku no passaporte servisu ne’e importante tebes, tanba bele fasilita di’ak liután movimentasaun entre ofisais diplomatas Timor-Leste ho Angola nian, hodi bele hametin liután kooperasaun bilateral iha futuru.
Ministru Negósius Estranjeirus nasaun rua ne’e asina mós memorandu entendimentu hodi estabelese kooperasaun iha área konsulta polítika diplomátika no mós akordu kooperasaun entre Akademia Diplomátika “Venâncio de Moura” Ministériu Relasaun Exterior Angola ho Sentru Estudu Diplomátiku MNEK Timor-Leste.
Prezidente Repúblika Angola, João Lourenço hateten, maske Angola seidauk harii embaixada iha Dili, maibé, delegasaun nasaun rua nian hala’o hela servisu no faktu hatudu, Timor-Leste ho Angola konsege asina instrumentu kooperasaun importante tolu ne’e, liu husi vizita estadu Prezidente Ramos-Horta nian iha Angola.
“Ami nia delegasaun sira konserteza funsiona no ida ne’e prova hosi faktu katak ami foin asina pesoalmente instrumentu kooperasaun balun entre ami nia nasaun. Potensiál ba kooperasaun entre ita na’in rua laiha limite, ita tenke hatene sente iha ne’ebé maka potensiál eziste no haree diretamente. Ami nia misaun atu koopera iha domíniu sira seluk iha domíniu turizmu, domíniu komérsiu,” hateten Prezidente Angola, João Lourenço iha konferénsia imprensa.
Prezidente Angola hatutan, Timor-Leste ho Angola iha relasaun ne’ebé di’ak tebes hanesan mós nasaun membru CPLP ne’ebé dura tinan barak ona, tanba ne’e, presiza dezenolve liután kooperasaun iha setór importante seluk tan hodi fó benefísiu ba povu no nasaun rua ne’e.
Nune’e mós Prezidente Repúblika, José Ramos-Horta hateten, asinatura ba akordu izensaun vistu ba titulares passaporte servisu no diplomátiku ne’e hanesan relasaun esessionál no ezemplár husi planu polítika diplomátika pesoál ho nasaun membru CPLP hotu liu-liu ho Repúblika Angola.
Nune’e ho akordu ba izensaun vistu ne’e, bainhira Timor-Leste adere ona ba ASEAN, Timor-Leste bele sai hanesan armajen ba resdistribuisaun protudu sira husi nasaun membru PALOP ho CPLP tama iha merkadu rejionál ASEAN.
“Ha’u fiar katak, ho ami nia adezaun ba ASEAN, hanesan ha’u nia konviksaun katak Timor-Leste bele sai hanesan armajen boot ba produtu sira hosi nasaun PALOP ka CPLP ba sira nia redistribuisaun iha área refere,” hatete Prezidente Horta.
Potensialidade koperasaun bilaterál Angola no Timor-Leste liu-liu iha dimensaun ekonómika PALOP, CPLP, Timor-Leste nu’udar membru ASEAN, halo parte iha merkadu rejionál ho konsumidór millaun 700 ho 4 triliaun PIB kombinadu husi nasaun sira ASEAN sira, tanba sei sai mós oportunidade boot ida ba CPLP ba implementasaun aktu kooperasaun balun ne’ebé estabelese ona.
Alende ne’e, Durante enkontru, Prezidente Repúblika, José Ramos-Horta extende konvite ba Xefe Estadu, João Lourenço, atu halo vizita ba Timor-Leste nu’udar aktu prinsípiu resiprosidade atu bele hametin liután amizade no kooperasaun entre nasaun rua.
Jornalista: Javelino Da Silva
