DILI Post-Ministru Negósius Estranjeirus no Kooperasaun (MNEK) Timor-Leste, Bendito dos Santos Freitas, ofisialmente formaliza ona Akordu Servisu Aero ho Ministru Transporte Malázia, YB Loke Siew Fook, kona-ba konektividade transporte aero entre Timor-Leste ho Malázia.
Akordu Air Service Agreement (ASA) entre Timor-Leste ho Malázia ne’e, Ministru Negósius Estranjeirus no Kooperasaun, Bendito Freitas, asina reprezenta Ministru Transporte Komunikasaun, Miguel Manetelo.
“Ne’ebé asina Air Service Agreement ho Ministru Transporte Malázia, ofisialmente ita asina ona akordu kona-ba servisu aero, ida-ne’e ita hein katak, parte téknika sira bele kontaktu malu hodi haree preparativus oinsá mak ba futuru bele iha ona voos aviaun husi Malázia ba Timor-Leste, nune’e mós possibilidade Timor nia aviaun bele tama mai Malázia,” hatete Ministru Bendito.
Ministru Bendito hatutan, akordu ASA ne’e importante tebes, no apoiu ona Timor-Leste nia dezenvolvimentu iha setór konektividade aero nian, nune’e sira prontu atu fahe esperiénsia no teknolojia ba kapasitasaun umanus ba liu-liu ba tékniku sira-ne’ebé servisu iha área aviasaun nian.
“Ida-ne’e akordu ida-ne’ebé importante teb-tebes. Ministru Transporte Malázia mós apoiu Tmor-Leste nia dezenvolvimentu ba setór konektividade aero nian, no prontu mós atu bele partilla sira-nia esperiénsia no tekenolojia ba kapasitasaun ita-nia rekursu umanus liu-liu ba sira-ne’ebé servisu iha área aviasaun nian,” katak Ministru.
Partisipa iha serimónia asinatura akordu ASA ne’e, Enkarreada Negósiu Embaixada Timor-Leste ba Malázia, Adelina Martins, Prezidente Autoridade Aviasaun Sivil Timor-Leste no seluk tan.
Jornalista: Javelino Da Silva
