DILI Post-Prezidente Repúblika Indonézia, Prabowo Subianto Deklara Hakarak Vizíta Timor Leste Hodi Hametin Relasaun Diplomátiku Entre Timor-Leste no Indonézia.
Prezidente Repúblika Indonézia Hato’o Asunto ne’e ba Primeiru-Ministru, Kay Rala Xanana Gusmão kona-bá Husu atu vizita Estadu mai Timor-Leste (TL).
“Nia mai komprimenta no husu atu bainhira mak nia bele bá Timor. Ha’u dehan, depois mak ita haree. Ne’ebé kapas tebtebes,” PM Xanana haktuir Bainhira Partisipa iha Tomada de Posse ba Prezidente Repúblika Indonézia Prabowo Subianto no Gibran Rakabuming Raka, iha salaun Nusantara-Parlamentu, Jakarta, Indonézia, Domingu ne’e (20/10/2024).
PM Xanana hateten, IX Governu Konstisionál define Timor-Leste poltika esterna ho prinsipiu ida-ne’ebé konsagra sentidu independensia no soberania maka: “Ba Timor-Leste, Laiha Aliadu ka Inimigu, Hotu-hotu sei hamutuk no Amigus de’it!.
“Ida-ne’e sai hanesan ita-nia lema ne’ebé sei orienta TL iha Relasaun Esterna, iha konjuntura internasionál ida ne’ebé daudaun ne’e difísil tebes,” Xanana subliña.
Iha biban hanesan ,Liu hosi diskursu dahuluk, Prabowo Subianto kompromete sei hametin liu tán relasaun di’ak ho nasaun hotu-hotu liu-liu nasaun viziñu sira.
“Liga ho asuntu internasionál, Indonézia hili dalan livre, ita lakohi tuir paktu militár ruma, tana ita hakarak ita hili dalan amizade ho nasaun hotu-hotu,” Prezidente Repúblika Indonézia bá dala-ualu ne’e afirma.
Prabowo mós promete atu durante iha nia ukun hamutuk ho estrutura halakon tiha grupuizmu, familiarizmu no partidarizmu.
Iha okaziaun ne’e Primeiru-Ministru, Kay Rala Xanana Gusmão espresa sentimentu kontente tanba bele partisipa iha serimónia posse ne’ebé Prabowo rasik mak konvida.
“Kontente tanba bele partisipa hamutuk ho rai barak iha tomada de pose Prezidente Prabowo. Prezidente nia diskursu temi buat ida kapas tebtebes katak, hanesan Prezidente labele haree de’it bá an, família no grupu, máibé mai atu servi. Hanoin di’ak tebtebes ida ne’ebé ha’u mós sempre ko’alia,” Xanana Gusmão sita diskursu Prabowo.
Primeiru-Ministru hatutan, Prabowo mós promete atu haree kona-bá problema hahán tanba sira la konsege rezolve problema hamlaha iha sira-nia rain.
“Nia ko’alia buat ne’ebé Indonézia agora enfrenta hela, la’ós de’it kona-bá hahán maibé uma laiha, no laiha servisu. Nia promete katak sei esforsu atu redús tiha problema sira ne’ebé Indonézia enfrenta. Kona-bá relasaun internasionál nia temi liu maka Indonézia tomak apoia Estadu Palestina ne’ebé ita mós apoia maibé nia diskursu orienta liu bá sosiedade no povu atu moris iha dame, labele hirus malu, hodi hothotu bele hanoin bá dezenvolvimentu nasaun,” PM Xanana hateten.
Xefe Governu ne’e mós observa katak, aktu hosi Prezidente Prabowo ne’ebé presta omenajen bá líder nasaun nian, hanesan aktu ida ne’ebé di’ak tebtebes tanba nia hakarak unidade nasionál, hodi hakotu diferensa saida de’it maka iha, hosi grupu, partidu tenke tau uluk interese nasaun no povu nu’udár devér boot liu ida-idak nia hanoin.
Iha serimónia posse ne’e nia rohan, Prezidente Prabowo Subianto ho Vise-Prezidente Repúblika, Gibran Rakabuming Raka komprimenta Primeiru-Ministru, Kay Rala Xanana Gusmão.
Ho nune’e Prezidente Repúblika Indonézia Prabowo Subianto agradese bá bainaka espesiál sira no hasé Prezidente Repúblika ho Primeiru-Ministru sira hosi nasaun oioin inklui Primeiru-Ministru Timor-Leste, Kay Rala Xanana Gusmão ne’ebé partisipa iha serimónia importante ne’e.
Jornalista:Javelino Da Silva
