DiliPost.com– Ligadu ho akontesementu loron Tersa feira (3/90) foin lalais ne’e, Sekretariu Estadu Asuntu Toponomia no Urbana(SEATOU) ho nia membru sira duni no estraga negosiante sira nia sasan iha kampung baru.
Ho asaun agresaun fiziku husi ekipa konjunta SEATOU ne’ebe hasoru Negosiante Cirilo Soares tanba sira konsidera durante ne’e negosiante iha fatin refere hetan notifikasaun dezde tinan 2023 kontinua la kopera.
Nune’e, Cirilo hanesan negosiante nafatin ‘sisi’ no hein promesa atu prepara fatin ba sira maibe too agora seidauk realiza.
Negosiante ne’ebe hetan baku husi membru SEATOU, Cirilo Soares hateten, durante ne’e sira hetan notifikasaun dezde tinan kotuk.
“Sira hatete atu prepara fatin ba ami negosiante Kampung Baru, ami hein hela to’o agora la realiza. Tanba, ami nia moris mak ne’e ona buka moris hodi sustenta familia,”dehan nia ba jornalista iha Vila-Verde, Kinta feira ne’e.
Nia haktuir sira hakarak ba faan sasan iha merkadu Manleu ho Taibesi. Maibe, fatin la sufisiente ba sira no sira hasoru difikuldade barak tanba ema la sosa sira nia sasan
“Ami ba iha ne’eba to’o ami nia sasan sira ne’e dodok hotu, tan ema la sosa. No maluk negosiante modo balu mos ba ona iha Manleu mais sira mai fali kampung baru tanba fatin la dun sufisiente,”tenik Cirilo.
Iha asaun ne’ebe SEATOU ho nia membru sira halo hasoru negosiante sira, negosiante balu hetan kanek no liman bubu.
Tan ne’e, Jerente Forsa Maubere Advicacy, Costantino de Jesus, informa sira komfirma advogadu Privadu hafoin akontesimentu ne’e ekipa advokasia tun direita ba hasoru vitima sira, hodi konversa no rekolla faktus sira maske durante ne’e akontese bebeik. Maibe, akontese ida foin lalais ne’e brutal tebes hahu husi ne’e ekipa advokasia tun ba konversa ho vitima sira ikus mai sira hato’o konkluzaun katak, primeiru sira presiza halo ezaminassaun juridika ida ba desizaun administrativa husi SEATOU rasik.
Nia dehan, hanesan parte advokasia ninian atu sira bele utiliza dalan legal tanba liu husi dalan legal ne’e, atu ema sira la iha kbiit ne’e bele dada iss.
“Ita persiza halo estudu ida depois halo keixa administrativu ida ba tribunal atu nune’e bele halo analiza. Ita persiza lori desizaun administrativu ne’e ba Tribunal nu’udar orgaun Judisiaria ne’ebe autonomo, independente no imparsial nune’e bele halo avaliasaun ka ezaminasaun juridika ida ba desizaun sira ne’e. Perante akontesementu ida ne’e ita fo advokasia para bele hato’o keixa kriminal, keixa penal halo denunsia ida ba Ministeriu Publiku nu’udar nain ba asaun penal,”dehan nia.
Jornalista : Anita Da Silva
