DiliPost.com- Kultura Paroquia Imaculada Conceição de Maria Maubisse (PICOMA) preparadu simu Sua Santidade Papa Francisco iha Paroquia Imaculada Conceição da Virgen Santa Maria Sé Catedral Dili.
Tuir koordenador ekipa Kultura Timor-Leste, Paulo Doutel Sarmento informa katak iha fulan Juñu Parokia Imaculada Conceiçao de Maria Maubisse hetan notisia husi Arcebispo Metropolita de Dili Dom Virgilio Cardeal do Carmo da Silva,SDB no Ministru Administrasaun Estatál rasik fo konfiasa ba Grupu Kultura PICOMA husi Munisipiu Ainaru Postu Administrativu Maubise, kultura ida ne’ebe moris nanis husi tinan 1989, ho primeiru Paroco padre Norberto do Amaral, hodi loke odamatan uma kreda nian.
Ho liafuan inkulturasaun, husi ne’ebá mai mak sira serbi ba Maromak, serbi ba estadu no ba natureza.
“Ami husi Paroquia Imaculada Conceição dd Maria, (ho lia fuan badak kultura PICOMA), mai iha sidade Dili hodi halo resesaun kultural, simu Sua Santidade Papa Francisco, maka ami halo preparasaun gladi seregala no bidu. Para iha dia 10 de Setembru dadeersan ami bele realiza serimonia resesaun kultural iha Katedral Dili, “dehan nia ba Jornalista iha Katedral, Sabadu(7/9) ohin.
Nia haktuir, tuir sekuensia ne’ebe sira simu husi Igreja no Governu maka pakote ida kompostu husi seregala ida, olik ida no tebe dahur ida.
Aliende ne’e, nia dehan zSeregala ida primeiru ho nia titulu simu ho look, olik ida daruak hasa’e no husu bensa matak malirin, tebe dahur ne’e katak reprezenta povu Timor husi Tutuala Lospalos too Lifau Oe-Kusi, husi Atauru Bikeli ba too iha Rai Betanu, sira reprezenta povu Katolika tomak sarani sira hodi hato’o Seja Bemvidu ba Sua Santidade Papa Francisco.
“Ami simu notisia husi Dom Virgilio Cardeal do Carmo da Silva,SDB no Ministru Administrasaun Estatal iha fulan Junu.Hahu kedas husi ne’eba simu notisia ami hahu ona ho preparasaun, hetan akompana husi Ami Paroco Paroquia Maubise no Administrador postu,”tenik Paulo.
Nia afirma, Kultura ba preparasaun nee naran, kultura Parokia Imakulada Conceicao de Maria Maubisi. No Huu karau dikur ne’e hodi haksolok povu Timor nian ba Sua Santidade Papa Francisco bainhira nia too mai Timor, lori sa seluk Saun Pedro nian iha Roma, entaun Timoroan sira simu Huu Karau Dikur toka Korneta.
Iha fatin hanesan, Koordenador Kultura iha Dioseze Dili,Antonio de Jesus Maria Gomes, esplika katak kultura look bua ho malus ne’e nu’udar kultura orijen bainhira bainaka ida mai, look ne’e hatudu amizade, respeitu no akolamentu hodi simu bainaka.
Iha ne’ebé iha mos labarik nain tolu mak sei representa lori Bua malus ba iha Sua Santidade nia iin
“Entaun iha sira nain tolu ne’e, mane ida no feto nain rua, mane lori biti ba nahe tuir kultura Timor nian, feto nain rua lori bua malus ahu, ida lori tabaku, batar Kulit ho Ai Turi,”dehan nia.
Nia hatutan, Daudaun ne’e sira preparadu ona hein ba simu papa, sira no nain tolu ne’e ida husi Likisa, ida husi Manatutu no ida husi Vikeke tanba sira nain tolu ne’e mak reprezenta dioseze tolu Dili,Baukau no Maliana.
Sira nain tolu nee ho naran, Augosto Caldas Lobato tinan 8 husi Munisipiu Likisa, Vanençia Maria de Sousa tinan 4 husi munisipiu Manatutu no Felicia Gomes de Britos Lopes, tinan 7 husi Munisipiu Vikeke.
Enkuantu Amo Paroco Paroquia Catedral Dili, Padre Paulus Maya mos relata katak, lian nain sira iha parte liur sira la iha buat ida ona no iha laran mak sira husu aumenta tan buat ruma .
Entretantu, husi grupu kultura ne’e hamutuk ema nain 30 kompostu husi mane 13 no feto 17.
Jornalista: Anita Da Silva
