DíliPost.com, Loron 31 Dezembro 2025 – Iha ámbitu selebrasaun Loron Nasionál ba Herói Sira, akontese momentu signifikativu ida ne’ebé dada atensaun públiku bainhira Prezidente Repúblika, José Ramos-Horta, hakat hodi kaer liman fali ho Eis Primeiru-Ministru, Mari Alkatiri.
Tuir observasaun jornalista DÍLI Post nian iha terrenu, momentu ne’e akontese hafoin Xefe Estadu remata serimónia tau ai-funan no fó omenajen ba Saudozu Nicolau Lobato nia estátua.
Hafoin fó omenajen ba erói nasionál ne’e, PR Ramos-Horta la’o hakat hodi kumprimenta membru Governu sira no mós Prezidente Tribunál Rekursu. Maibé, buat ne’ebé sai foku mak bainhira Prezidente Repúblika hakat kedas ba hodi hasoru no kaer liman ho Eis Primeiru-Ministru Mari Alkatiri.
Jestu ne’e konsidera hanesan sinál unidade no dame entre líder nasionál sira, liuliu iha loron ne’ebé nasaun tomak hanoin hikas sakrifísiu husi herói sira ne’ebé luta ba independénsia Timor-Leste nian.
Serimónia ne’e la’o ho di’ak no partisipa husi autoridade estadu nian, eis Tituláres sira, no mós família erói sira nian.
Jornalista : Azacsi Quintão
