Dílipost.com, Loron 20 Juñu 2026 – Primeiru-Ministru (PM), Kay Rala Xanana Gusmão selebra aniversáriu bá dala-80 ho emosaun mata-been iha Mosteiro São Jerónimo Belém, Lisboa, Portugal, hafoin Missa Agradesimentu ne’ebé realiza iha loron Sábadu ohin.
Selebrasaun Eukarístika ne’e prezide hosi Padre José Manuel dos Santos Ferreira no konselebra hosi padre timoroan sira ne’ebé atualmente hala’o estudu no misaun pastorál iha Portugal.
Iha omilia, Padre José Manuel dos Santos Ferreira uza referénsia hosi mensajen Papa Francisco nian durante vizita Apostólika bá Timor-Leste iha tinan 2024.
Padre Manuel lembra katak bainhira Papa Francisco husu kona-bá “riku soin” Timor-Leste nian, resposta ne’ebé fó mak povu timoroan sira rasik.
Tuir Padre Manuel, rikeza bo’ot liu Timor-Leste nian maka ema timoroan sira, ne’ebé presiza hetan atensaun no kuidadu hosi ema hotu.
Tanba ne’e, Padre selebrante ne’e husu atu kontinua tau matan bá labarik sira, juventude no katuas sira atu asegura futuru di’ak bá nasaun.
Iha okaziaun ne’e, Padre Manuel mós hato’o parabéns bá Primeiru-Ministru, Kay Rala Xanana Gusmão ne’ebé selebra aniversáriu bá dala-80 no harohan bá Maromak atu fó saúde di’ak, moris naruk, matenek no forsa hodi kontinua lidera no servisu bá povu no nasaun Timor-Leste.
Missa ne’e realiza iha ambiente solene no reflexivu, sai hanesan momentu atu hato’o agradesimentu bá Maromak bá moris no servisu Primeiru-Ministru nian durante tinan 80.
Missa ne’e mós atu husu bênsaun bá PM Xanana nia lideransa no dedikasaun kontinua bá povu no rai Timor-Leste.
Hafoin missa, komunidade timoroan no konvidadu sira hato’o parabéns bá PM Xanana ho mata-been no hakruk respeitu bá nia kontribuisaun durante dekada sira bá luta libertasaun no dezenvolvimentu Timor-Leste nian.
Barak hosi partisipante sira hatudu admirasaun bá lider timoroan ne’e, tanba maski idade ona to’o tinan 80, nia kontinua hatudu enerjia, komprimisu no determinasaun atu servisu bá povu no nasaun.
Partisipa iha missa agradesimentu ne’e Vise-Primeiru-Ministru Francisco Kalbuadi Lay, Embaixadór Timor-Leste iha Portugal, Manuel de Araújo Serrano, Embaixadora Timor-Leste bá CPLP, Manuela Carrascalão, Embaixadór Timor-Leste bá Reinu Unidu, João Paulo Rangel, Ministru Justisa Sérgio da Costa Hornai, Ministra Edukasaun, Dulce de Jesus Soares, Ministra Saúde, Élia dos Reis Amaral, Vise-Ministra bá Asuntu ASEAN Milena da Costa Rangel, Prezidente CCI-TL, Jorge Manuel de Araújo Serrano, relijioza timoroan sira iha Portugal no estudante timoroan sira ne’ebé hela no estuda iha Portugal.
Jornalista : Dílipost.com
