Dílipost.com, Loron 02 Juñu 2026– Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay, hatete katak selebrasaun Loron Nasionál Tasi sai oportunidade importante ida atu hametin kompromisu Governu ba protesaun marítima, konservasaun ambiente no dezenvolvimentu sustentável iha Timor-Leste.
Iha konferénsia imprensa ne’ebé realiza iha sentru konvensaun Díli (CCD), Francisco Kalbuadi Lay dehan katak Loron Nasionál Tasi ne’ebé sei selebra iha loron 5 Juñu 2026, lori mensajen importante kona-ba valor tasi hanesan patrimóniu nasionál no fonte moris ba komunidade sira ne’ebé hela iha área kosteira.
“Iha Loron 5 Juñu 2026 Timor-Leste selebra Loron Nasionál Tasi, atu valoriza tasi hanesan patrimóniu nasionál, fonte moris ba komunidade sira iha área kosteira no elementu importante ba dezenvolvimentu sustentável iha ita nia rai doben,” hateten Vise-Primeiru-Ministru.
Nia esplika katak tasi mak parte importante ida husi identidade no kultura povu timoroan nian. Tanba ne’e, rekursu marítimu sira tenke proteje no preserva ba jerasaun sira ne’ebé sei mai iha futuru.
VPM Francisco Kalbuadi Lay, selebrasaun Loron Nasionál Tasi mós hakarak fó hanoin ba sidadaun hotu-hotu kona-ba responsabilidade koletiva atu proteje oseanu, promove prátika peska sustentável no garante konservasaun ekosistema marítima ne’ebé suporta moris no ekonomia nasaun nian.
“Lori naran Governu nian, ha’u hamutuk ho Sekretáriu Estadu Komunikasaun Sosiál reafirma fila-fali kompromisu atu implementa polítika no planu asaun sira ba promosaun ekonomia tasi ne’ebé resiliente no sustentável iha Timor-Leste,” dehan nia.
Vise-Primeiru-Ministru subliña katak Governu kontinua fó prioridade ba protesaun ambiente, kombate poluisaun tasi no jestaun sustentável rekursu naturál sira ne’ebé iha área marítima no kosteira.
Nia mós rekoñese kontribuisaun husi komunidade lokál sira, organizasaun sosiedade sivíl, parseiru dezenvolvimentu no instituisaun públika sira ne’ebé durante ne’e servisu hamutuk atu proteje no preserva tasi Timor-Leste nian.
Atividade sira ne’ebé integra iha programa selebrasaun Loron Nasionál Tasi inklui kampaña sensibilizasaun ambiente, limpeza tasi, karavana oseanu no programa edukativu ba juventude atu promove konseitu ekonomia azul sustentável.
Nia dehan ekonomia azul sai estratéjia importante ida atu diversifika ekonomia nasaun nian no promove utilizasaun sustentável ba rekursu marítimu sira. Inisiativa ida-ne’e lidera husi Primeiru-Ministru Kay Rala Xanana Gusmão liuhosi programa ekonomia azul.
Selebrasaun Loron Nasionál Tasi hahú ona iha munisípiu balun, inklui Lautém, no sei kontinua to’o loron 8 Juñu 2026 iha munisípiu sira seluk no iha Díli.
Iha oportunidade ne’e, Francisco Kalbuadi Lay apela ba sidadaun hotu-hotu, liuliu juventude no estudante sira, atu partisipa ativamente iha atividade sira ne’ebé organiza durante semana oseanu.
“Ha’u apela ba ita hotu-hotu, liuliu jovem sira no komunidade sira, atu mai partisipa iha atividade furak ida-ne’e. Ita hotu kaer liman hamutuk atu promove no proteje ita nia tasi,” dehan nia.
Nia konklui katak konservasaun ambiente marítima no oseanu la’ós de’it responsabilidade Governu nian, maibé responsabilidade ema hotu-hotu ne’ebé presiza koperasaun entre Governu, setor privadu, komunidade no parseiru internasionál sira.
Governu mós hato’o agradesimentu ba ministériu, instituisaun no entidade relevante sira ne’ebé envolve iha organizasaun selebrasaun Loron Nasionál Tasi 2026.
Jornalista :Azacsi Quintão
