DíliPost.com – Prezidente Repúblika José Ramos-Horta hato’o sentimentu Solidariedade kona-ba tiruteiu Bondi Beach iha Sydney, Austrália
Tuir informasaun Dili Post asesu iha Deklarasaun Iha Prezidente Repúblika 15 Dezembru 2025 – Ho hakfodak no triste ne’ebé kle’an wainhira simu notísia kona-ba atake trájiku ne’ebé akontese iha Praia Bondi iha Sydney, ne’ebé hamate ema inosente sira no halo ema barak hetan kanek, iha hahalok violénsia ne’ebé laiha sentidu ne’ebé halo sosiedade Australiana no ita hotu hakfodak tebes.
Hodi Povu Timor-Leste nia naran ” ha’u hato’o ba Governadora-Jerál Honorável Sra. Sam Mostyn AC, Governu no Povu Austrália, ami-nia sentiment kondolénsia profunda ba vida sira ne’ebé lakon no solidariedade ho família enlutada sira no ho sira hotu ne’ebé afetadu hosi hahalok aat ida-ne’e,” sita iha deklarasaun PR José Ramos-Horta.
Timor-Leste kondena maka’as forma terorizmu, estremizmu no ódiu hotu-hotu, inklui antisemitizmu, no reafirma kompromisu metin ba pás, toleránsia no respeitu ba malu entre povu sira.
” Ami sente triste tebes no hakarak espresa katak Austrália maka sosiedade ida ne’ebé tolerante liu, diversu no multikulturál, atake ida-ne’e ne’ebé akontese iha momentu observasaun relijioza nian, konstitui ofensa ida ba valór universál sira moris nian, dignidade umana, liberdade adorasaun nian, no ko-ezisténsia pasifika entre komunidade sira,” hateten iha Deklarasaun.
Iha momentu laran-susar no laran-susar ida-ne’e, ami partilla lutu Povu Austrálianu nian no reitera Timor-Leste nia konfiansa iha reziliénsia husi instituisaun demokrátiku sira Austrália nian no ba kapasidade povu nian atu mantein unidu hasoru adversidade.
Hein katak memória vítima sira nian bele hetan onra, no hein katak sira-nia família bele hetan kmaan, forsa no solidariedade durante periodu sofrimente profunda ida ne’e.
