Dílipost.com, Loron 02 Juñu 2026 – Governu Dasia Liuhosi Ministériu Transportes no Komunikasaun (MTK) ofisialmente lansa plataforma digital verify.gov.tl, sistema verifikasaun eletrónika ne’ebé uza teknolojia blockchain atu garante seguransa, integridade no autentisidade dadus no dokumentu digital sira. Plataforma ida-ne’e dezenvolve liuhusi kooperasaun entre ekipa tékniku Timor-Leste no Reino Kamboja durante períodu tinan ida.
Ministru Poste no Telekomunikasaun Reino Kamboja, Chea Vandeth, hatete katak Governu Kamboja sente orgullu bele kontribui ba dezenvolvimentu plataforma ne’e, ne’ebé konsidera nu’udar pasu importante ida ba transformasaun dijital no modernizasaun servisu públiku iha Timor-Leste.
Nia hatutan, verify.gov.tl la armazena ka rai dadus sidadaun sira. Dadus hotu-hotu kontinua iha kontrolu husi Ministériu Transportes no Komunikasaun Timor-Leste, ne’ebé responsabiliza ba jestaun no manutensaun informasaun refere.
“Plataforma ida-ne’e rasik la guarda dadus. Dadus hotu-hotu pertense ba Ministériu. Bainhira sidadaun hakarak uza nia informasaun, nia bele halo verifikasaun liuhosi sistema ida-ne’e, no informasaun mai diretamente husi servidor Ministériu nian,” dehan Chea Vandeth ba jornalista sira iha Salaun GMN Bebora.
Nia esplika tan katak teknolojia blockchain ne’ebé uza iha plataforma ne’e garante seguransa informasaun tanba permite de’it proprietáriu dadus no entidade autorizada asesu ba informasaun refere. Ho sistema ida-ne’e, ema seluk la bele haree, altera ka uza dadus sira sem autorizasaun.
Ministru ne’e, implementasaun blockchain sei aumenta konfiansa públika ba dokumentu dijital sira tanba garante autentisidade no integridade informasaun. Teknolojia hanesan ida-ne’e implementa ona ho rezultadu positivu iha Reino Kamboja.
Chea Vandeth dehab katak plataforma blockchain ne’ebé dezenvolve iha Kamboja hetan ona rekonesimentu importante iha rejiaun ASEAN.
Plataforma refere simu Golden Award hosi Ministru Dijital ASEAN sira tanba konsidera nu’udar inovasaun ida-ne’ebé kontribui ba transformasaun dijital no seguransa informasaun.
Aleinde rekonesimentu rejionál, plataforma ne’e mós hetan apreciasaun iha nível internasionál. Maibé, nia seidauk bele fó detallu kona-ba instituisaun ne’ebé atribui premiu refere tanba sei hein anúnsiu ofisiál ne’ebé previstu realiza iha loron 25 Juñu 2026.
Kona-ba prosesu dezenvolvimentu verify.gov.tl, Ministru Kambojanu ne’e hatete katak projetu hahú hosi asinatura Memorandu Entendimentu (MoU) entre parte rua iha Janeiru 2025. Depois hosi akordu refere, ekipa tékniku husi Timor-Leste no Kamboja servisu hamutuk durante tinan ida atu adapta plataforma ne’e ba nesesidade no realidade Timor-Leste nian.
“Depois hosi MoU, ekipa tékniku husi parte rua servisu hamutuk durante tinan ida. Ho kolaborasaun ne’e, ohin ita bele realiza lansamentu ofisiál verify.gov.tl,” realsa nia.
Lansamentu plataforma verify.gov.tl konsidera nu’udar etapa importante ida ba dezenvolvimentu governasaun digital iha Timor-Leste. Sistema ne’e espera bele promove transparénsia, reforsa seguransa dadus no fasilita prosesu verifikasaun dokumentu eletróniku ba sidadaun no instituisaun sira iha futuru.
Jornalista Estajiaria: Catarina Alda
