DiliPost.com-Deputadu sira halo ona proposta ba Parlamentu Nasional (PN), prevee ona iha sira nia orsamentu ba tinan ida ne’e, ho total $ 23 Millioins, husu atu sosa karreta foun ba sira hodi uza hala’o servisu ba fiskalizasaun iha baze, tanba karreta hirak ne’ebe sira uza a’at ona no halo manutensaun beibeik.
Ho razaun ne’ebe hato’o husi reprezentante povu iha Uma Fukun PN, Deputadu 65 deside hakarak sosa karreta foun ba sira. Maibe, bainhira foka konaba Situasaun no Kondisaun (SiKon), ne’ebe akontese iha terrenu nota katak, povu sira agora daudaun sofre hela buat barak.
Liu-liu nesesidade baziku ne’ebe ho folin agora daudaun la estabil. Pressu foos agora iha Merkadoria to’o agora nunka rezolve. Iha Kapital Dili de’it foos ho 25 kg, $ 18.00, saa tan iha Munisipiu sira la hatene hira.
Razaun Deputadu sira hakarak sosa karreta foun ba sira, tanba karreta tuan halo manutensaun beibeik. Maibe, saa esforsu mak sira halo hodi ultrapasa problema ne’ebe agora daudaun hanehan hela povu. Tanba, povu hili sira ba tu’ur iha PN lori aspirasaun povu. La’os ba sira nia an de’it.
Ida ne’e, tenke tetu iha sira ninia hanoin ou programa. Lia fu’an simples ne’ebe bele hateten, iha biban ida ne’e, Deputadu hakarak sosa karreta foun ba sira, maibe povu iha baze sofre hela ho pressu foos no nesesidade baziku sira seluk.
Deside
Sosa karreta fasilidade dever tuir Lei hateten, agora dehan la bele sosa karreta ne’e, klaru la bele fo karreta-2 ba ema ida. Tanba, karreta agora ne’e, depois Avaliasaun tinan kotuk la bele hola tanba bainhira ta’u subsidiu, Lei la fo dalan. Tan ne’e,”ha’u deside halo proposta ta’u iha ne’eba no Deputadu sira lakohi, la iha buat ida. Ami bele hasa’i, tanba to’o agora seidauk iha desizaun entre viajen ba Estranjerus hasa’i ou sosa karreta mak hasa’I,”informa Prezidente Parlamentu Nasional (PPN), Maria Fernanda Lay ba Jornalista iha PN, Kinta-feira horseik.
Dalan
PPN-Maria informa, atu sosa karreta ba Deputadu hirak ne’e, Lei fo dalan tanba uza fasilidade Estadu hodi ba hala’o servisu. Maibe, daudaun ne’e, Deputadu sira balun se’i uza hela karreta ne’ebe uluk eis Deputadu sira uza.
Ho kondisaun la di’ak ona tenke halo manutensaun beibeik, tan ne’e, Deputadu sira deside atu PN sosa fali karreta foun ba sira hodi uza ba hala’o servisu. Total karreta ne’ebe atu sosa total-65. Sura Deputadu sira hotu hamutukn ho PPN rasik planu sosa karreta ne’e, rasik Deputadu sira hotu hakarak.
Votasaun
Planu PN atu sosa karreta foun ne’e, tama hotu iha orsamentu 23 Milioins, PN se’i sosa karreta ba Deputadu sira hamutuk-65. Deputadu sira hotu hakarak atu sosa karreta foun. Ho ida ne’e, sira lakohi halo votasaun, tanba dehan karreta Deputadu sira uza daudaun ne’e, kondisaun la di’ak ona.
Maria hatutan, karreta ne’ebe daudaun ne’e, Deputadu sira uza karreta ne’ebe eis Deputadu sira balun nian. Karreta balun kondisaun la di’ak ona sira tenke hasa’i osan halo manutensaun.
Manutensaun
Karreta ne’ebe Deputadu sira uza ne’e, barak mak la di’ak ona, kada semana,”ha’u tenke ba rezolve trata manutensaun ba karreta hirak ne’e. Karik aban bain rua sosa dunik karreta foun karreta hirak ne’e, entrega fali ba Patrimoniu Estadu hodi halo lelaun,”klarifika nia.
Tanba, karreta balun kondisaun la di’ak loos ona, tanba Deputadu sira mos la iha kuidadu uza fasilidades ne’ebe fo no Deputadu sira balun mos dehan karreta Pajero la di’ak ou la ‘Layak.
Maibe, atu sosa karreta hotu mak deside,”mai ha’u rasik la tama atu hili karreta nia model,”dehan Maria.
Se karreta foun sosa dunik, karreta tu’an sira se’i entrega ba iha Patrimoniu Estadu hodi halo lelaun. Tanba, karreta hirak ne’e, kondisaun la di’ak no balun la di’ak ona atu halo manutensaun.(al)
