Dílipost.com Loron 19 abríl 2026 – Boxista Timor-Leste prepara-an durante fulan tolu nia laran no prontu atu reprezenta nasaun iha eventu internasionál Trigger Promotion 7 iha Vietnam, ne’ebé sei hasoru boxista Vietnam iha kategoria 66.7 kg.
Boxista Timor-Leste, reprezenta husi Klubu Tomás Americo Boxing, Francisco da silva Soares, ne’ebé koñesidu ho naran ringue Maulay-Lym hatete, nia prontu atu reprezenta nasaun iha eventu internasionál Trigger Promotion 7 ne’ebé sei realiza iha Vietnam.
Nia partisipa iha eventu ida-ne’e depois halo preparasaun durante fulan tolu, ho objetivu atu atinji rezultadu.
“Ha’u prepara an durante fulan tolu. Ha’u sente katak agora tempu atu hatudu ha’u nia kapasidade iha ringue. Motiva husi treinadór, kolega sira no família halo ha’u sai konfiansa liu,” hateten Maulay ba jornalista Dílipost.com iha via WhatsApp
Maulay preparasaun ne’ebé nia halo la’ós deit iha aspetu físiku, maibé mos iha mental no disiplina. Durante fulan hirak ne’e, nia treina loron-loron ho orientasaun husi treinadór sira no apoiu husi kolega boxista sira iha klubu Tomas Ameriku klubu.
Nia hatutan katak motivasaun bo’ot liu mai husi família, ne’ebé kontinua fó forsa no hametin nia espiritu atu la iha desafiu ruma.
Iha kompetisaun ida-ne’e, Maulay sei hasoru boxista husi Vietnam, Tum Lam, iha kategoria peju 66.7 kilograma. Jogu sei hala’o ho sistema ronde ha’at no tama iha klase profesionál, ne’ebé presiza abilidade, rezisténsia no estratéjia aas.
Eventu ida-ne’e konsidera hanesan oportunidade bo’ot ba Maulay atu prova nia nivel iha kompetisaun internasionál.
Maski enfrenta adversáriu ne’ebé mai husi nasaun anfitriaun, Maulay dehan katak nia la tauk no sei fó nia mellór atu atinji vitoria.
Nia mos dehan lori responsabilidade bo’ot atu reprezenta Timor-Leste ho dignidade no orgullo.
“Ha’u husu ba povu Timor-Leste tomak atu fó apoiu no orasaun ba ha’u. Suporta husi ita hotu importante tebes atu fó forsa ba ha’u iha ringue. Ha’u hakarak lori Timor-Leste nia naran sae ba nivel internasionál,” nia dehan.
Eventu Trigger Promotion 7 sei hala’o loron 19 abríl 2026 iha Vietnam, iha oras Vietnam 03:00, ne’ebé korresponde ho oras Timor-Leste 05:00.
Partisipasaun Maulay iha eventu internasionál ida-ne’e hatudu katak boxista iha Timor-Leste kontinua dezenvolve no hetan oportunidade atu kompete iha nivel global. Espera katak nia prestasaun bele inspira joven sira seluk atu envolve an iha mundu depespotu no lori nasaun nia naran ba oin.
Jornalista: Azacsi Quintão
