DiliPost.com-Prezidente Banku Aziátiku ba Dezenvolvimentu (ADB), Masato Kanda, iha loron Kinta Feira (17/7), hala’o vizita dahuluk mai Timor-Leste (TL) no iha Komitmentu apoiu ba dezenvolve iha nasaun ne’e, hodi kontinua hametin forte Parseria entre TL no ADB.
Hafoin to’o iha Areportu Portu Internasionál Nasionál Prezidente Nicolau Lobato Komoro, iha tuku 12:20, oras TL, ho aviaun Citilink. Prezidente ADB, hateten, sente onradu tebes atu vizita TL ba dahuluk nu’udar Prezidente Banku Dezenvolvimentu Aziátiku.
Nia hateten, dezde 2002, ADB hamriik hanesan sira-nia parseiru fiar-na’in, investe iha infraestrutura, dezenvolvimentu umanu, no oportunidade foun ba ema hotu. Enkuantu TL prepara ba adezaun istóriku ba Asosiasaun Nasaun sira Sudeste Aziátiku nian (ASEAN), nune’e sente orgullu ho knaar ne’ebé ADB hala’o hodi apoia ba integrasaun.
“Adezaun ba ASEAN hanesan odamatan ba posibilidade foun ba komérsiu, investimentu, no kooperasaun. Saida maka halo ha’u hakfodak liu maka espíritu kolaborativu iha projetu ida-ne’e nia kotuk. Parseria entre ADB, Austrália, Japaun, no Timor-Leste hatudu kbiit atu servisu hamutuk hodi rezolve dezafiu kompleksu sira,” hateten Prezidente ADB Masato Kanda ba jornalista iha Areportu Internasionál Prezidente Nicolau Lobato Komoro.
Lider ADB, sublina, ezemplu prinsipál ida hosi parseria ne’e iha asaun maka iha nia vizita ba Aeroportu Internasionál Prezidente Nicolau Lobato, iha-ne’ebé ADB nia investimentu millaun $297.9 transforma Timor-Leste nia odamatan prinsipál ba mundu.
La’o liuhosi instalasaun terminál atuál sira ho Ministru Transporte no Komunikasaun Miguel Marques Gonçalves Manetelu no ADB iha nia parseiru dezenvolvimentu sira hosi Japaun no Austrália.
“Ha’u asiste nesesidade urjente ba modernizasaun no potensiál boot ne’ebé investimentu ida-ne’e iha. Espansaun aeroportu hanesan fatuk-inan ba Timor-Leste nia estratéjia diversifikasaun ekonómika no roteiru adezaun ba ASEAN. To’o 2030, instalasaun ne’ebé hadi’a ona hein atu atende pasajeiru liu 400,000 tinan-tinan, hodi loke oportunidade foun sira ba komérsiu, turizmu, no investimentu estranjeiru,” afirma Masato Kanda.
Entretantu, durante iha TL Prezidente ADB, Masato Kanda, sei hasoru malu líder sira hodi ko’alia kona-ba apoiu ADB nia ba TL nia luta ba prosesu dezenvolvimentu nasional.
“Durante ha’u nia vizita, ha’u hein atu hasoru malu ho TL nia líder sira hodi ko’alia kona-ba oinsá ADB bele apoia liután prioridade dezenvolvimentu nasaun nian. Importante liu, ha’u mai iha ne’e atu rona no aprende husi povu TL atu kompriende ita-boot sira-nia esperansa no aspirasaun atu nune’e ADB bele sai parseiru ne’ebé di’ak liu atu ajuda realiza TL nia promesa tomak. Ami nia apoiu sei kontinua, iha etapa hotu-hotu,”hakotu Masato Kanda
Prezidente ADB Masato Kanda hafoin iha Aeroportu Internasional Presidente Nicolau Lobato Komoro, simu Husi Ministra Finansa Santina Cardoso no Ministru Transporte no Komunikasaun Miguel Marques Gonçalves Manetelu no akompaña husi Prezidente Admimistrasaun Aeroportu no Navegasaun Aerea, Timor-Leste Empreza Públika (ANATL, E.P) Romualdo António da Silva hala’o observasaun ba Areportu.(lusina)
