DILIPost.com- Hafoin Primeiru-Ministru, Kay Rala Xanana Gusmão hala’o reniaun urjensia ho Komandante Jerál PNTL, Komisariu Jerál Polisia, Henrique da Costa no Segundu Komandante Jerál Polísia Nasional Timor-Leste (PNTL) Komisariu Polísia Pedro Belo hodi fó orientasaun ba Komandu PNTL ho apoiu Komandu F-FDTL nian atu solusiona konflitu entre Grupu Arte Marsiál (GAM) no Grupu Arte Rituál (GAR) iha Suku Lourba no Suku Carabau, Postu Administrativu Bobonaro, Munisipiu Bobonaro.
Tuir Primeiru-Ministru Xanana Gusmão, preokupa no triste tebes ba konfrontu fízika entre grupu juventude sira ne’ebé akontese, sesta (03/11/2023) lokoraik rezulta ema na’in-hitu (7) kanek no uma haat hetan sunu, kioske rua (2) ho uma ualu (8) hetan estragu (baku rahun) hodi halo populasaun halai no trauma.
Tan ne’e Xefe Governu promote iha semana ne’e liu hosi reniaun Konsellu Ministru sei taka Organizasaun Arte Marsiál no Grupu Arte Rituál hodi evita konflitu ne’e labele kontinua akontese bebeik ba munisipiu seluk.
“Ita triste tebes sira tuda malu, sunu uma iha Bobonaro parte Lourba no Carabau, tanba ne’e polisia tenki reforsa seguransa. Ha’u sei realiza renian kuarte-feira agora iha Konsellu Ministru, tanba nu’udar Primeiru Ministru ha’u labele aseita katak, ita hosik nafatin artemarsiál sira estraga ita nia sosiedade, Konsellu Ministru sei taka tiha grupu arte marsiál sira no grupu arte rituál sira,” dehan PM Xanana durante enkontru ho Komandante PNTL, iha Komandu Jerál PNTL, Caicoli Dili Sabadu nee(4/11).
Xefe Governu mós husu ba PNTL liu hosi Ofisiál Polisia Suku (OPS) atu koopera ho autoridae suku, Igreja no Lia Nain no Juventude sira hodi hala’o kedas dialogu ba dame entre parte hirak ne’ebé komete problema.
PM Xanana mos orienta PNTL atu kaputra hotu oknum juventude hirak ne’ebé envolve hodi responsabiliza ba krime ne’ebé sira komete.
“Ha’u halo apelu ba povu tomak, hosi aman, inan, to’o oan sira liu-liu joven sira. joven sira uluk, imi nia aman, inan mate ba rai ida ne’e, agora imi oho malu tanba buat ida ke la folin buat ida”, PM Xanana Afirma.
Lider Rezistensia Ne’e alerta mós ba responsabel GAM no GAR kuandu la kontrola sira nia membru halo nafatin krime, governu sei hatun orden hodi kaer maka lider sira ne’e.
PM Xanana promote sei bolu membru PNTL no F-FDTL sira ne’ebé envolve iha grupu GAM no GAR sei halo juramentu jerál hodi sai para halo servisu ho independente.
“Ba membru PNTL no F-FDTL para para indentifika la’òs kartigu, indentifika polisia no F-FDTL hotu- hotu ne’ebé partense ba GAM no GAR iha loron 28 Novembru 2023 halo juramentu hodi sai hosi grupu para defende povu,” PM alerta.
Iha fatin hanesan, Komisariu Jerál PNTL Henrique da Costa informa Komandu hatun ona membru PNTL hodi halo atuasaun no hari postu seguransa provizoriu hodi evita konflitu ne’e.
Komisario Ne’e Imforma mos ,PNTL halo ona indentifikasaun ba vitima balun ne’ebé kanek deskunfia sai mós nu’udar suspeitu ba konflitu no sei buka hodi kaer tan hirak ne’ebé halai.
“Tuir informasaun inisiál ne’ebé mak ita iha problema partikulár hadau malu rai, depois mos iha problema família fetosaa umane no liga mos arte Marsiais no iha informasaun halai ba rasa oituan (bunak no kemak) mais ida ne’e informasaun inisiál depois ita nia PNTL identifika mak ita foun hatene motivu loloos” hateten Komisáriu Henrique da Costa.
Lider Masimu PNTL ne’e, Sublina Hafoin Akontese tiha Konfrontus ne’e polísia mós rekolla evidénsia lubuk ida mak,hanesan rama ambom , katana, dima no sasán kro’at seluk tan sira utiliza hodi estraga ita nia komunidade.
Ho problema ne’ebe mosu entre Joven sira iha Suku Karabau no Lourba parte PNTL koloka kedas Menbru Unidade Espesial Polísia (UEP) husi Suai no Bobonaru hamutuk ho FALINTIL Forsa Defeza Timor-Leste (F-FDTL) destaka kedas iha Fatin Akontesmeto hodi halo prevensaun.
Reportajém:Javelino silva
