DILI Post-Ministru Negósius Estranjeirus no Kooperasaun, Bendito dos Santos Freitas ho Vise Ministru Negósius Estranjeirus Vietnam, Do Hung Viet, asina akordu ona kona-ba aplikasaun ijensaun vistu ba passaporte servisu no diplomátiku entre Timor-Leste ho Repúblika Sosialista Vietnam.
Testamuña ba asinatura akordu ne’e, Prezidente Repúblika, José Ramos-Horta ho nia omólogu Prezidente Repúblika Sosialista Vietnam, To Lam, hafoin remata enkontru bilateral iha Palásiu Prezidensiál.
Ministru Negósius Estranjeirus no Kooperasaun, Bendito Freitas hateten, Timor-Leste ho Vietnam selebra ona akordu kona-ba ijensaun vistu ba passaporte servisu no diplomátiku, tanba ne’e mu’udar prinsípiu adezaun Timor-Leste nian ba ASEAN.
“Iha prosesu enkontru ne’e mós termina ho asinatura akordu ida kona-ba ijensaun vitus ba passaporte servisu no passaporte diplomátku. Ida-ne’e hanesan prisíspiu ida-ne’ebé Timor-Leste nia adezaun ba ASEAN, hanesan parte integrante katak, paízes ASEAN sira ita iha konkordánsia ba akordu ijensaun vistu ba passaportes servisu no diplomátikus, aumezmu tempu sei trata ba ijensaun ba passaporte ordináriu, ita espera katak, kooperasaun bilateral entre Timor-Leste ho Vietnam, bele forte liután,” hatete Ministru Bendito.
Ministru Bendito hatutan, enkontru ne’e, destaka mós kona-ba mekanizmu valores no prinsípius kooperasaun ida-ne’ebé mak Vietnam bele tulun Timor-Leste nia adezaun ba ASEAN, no apresia mós Timor-Leste nia susesu lubuk ida-ne’ebé alkansa hodi bele sai membru plenu ba ASEAN inklui Organizasaun Mundiál Komérsiu.
“Importante liu mós ohin ita-nia Prezidente Repúblika mós husu atu Vietnam estabelese ona embaixada iha Timor-Leste, tanba ita tau ona ita-nia embaixada iha paízes ASEAN hotu, agora Vietnam mós tau nia embaixada iha Timor-Leste di’ak teb-tebes, nestemomentu Embaixadór Vietnam ne’ebé kobre ba Timor-Leste ne’e nia rezidente iha Jakarta,” hatete Ministru Bendito.
Timor-Leste no Vietnam Diskute Reforsu Kooperasaun Bilateral
Ministru Negósius Estranjeirus no Kooperasaun, Bendito dos Santos Freitas, akompaña Prezidente Repúblika, José Ramos-Horta, hala’o enkontru bilateral ho Prezidente Repúblika Sosialista Vietnam, To Lam, hodi diskute reforsu kooperasaun bilateral entre nasaun rua.
Durante enkontru, Ministru Negósius Estranjeirus no Kooperasaun, Bendito Freitas informa, Xefe Estadu Vietnam, To Lam husu atu Timor-Leste ho Vietnam kria mekanizmu kooperasaun polítika ida hodi diskute hamutuk programa kooperasaun entre nasaun rua.
“Ohin iha enkontru bilateral ne’e, Prezidente Repúblika Vietnam nian husu atu estabelese mekanizmu kooperasaun polítika anível Ministériu Negósius Estranjeirus, Ministériu ba Assuntus Ekonómikus no Ministériu sira seluk par ekipa téknika bele halo diskusaun kona-ba elementu halo parte kooperasaun importante entre Timor-Leste ho Vietnam,” dehan Ministru Bendito.
Kriasaun ba mekanizmu kooperasaun ne’e, sei lidera husi Ministériu Negósius Estranjeirus Timor-Leste ho Vietnam, ne’ebé envolve mós Ministériu relevante, atu bele diskute substánsia kooperasaun iha área hanesan ekonomia, agrikultura, kapasitasaun rekursu umanu, formasaun professional, konsulta polítika diplomátika no mós edukasaun, ensinu superior no seluk.
“Iha mós komisaun konjunta ne’ebé bele haree ba aspetu kooperasaun ekonómika, ida-ne’e klaru katak, kompeténsia tomak ita-nia Vise Primeiru-Ministru ba Assuntus Ekonómikus, atu bele halo diskusaun kona-ba substánsia kooperasaun iha área ekonómika, agrikultura mós sai parte integrante, tanba Vietnam hanesan nasaun ida-ne’ebé potensiál teb-tebes ba agrikultura, iha tinan kotuk, ita-nia Governu mós iha kooperasaun ho Vietnam kona-ba komérsiu de arros,” dehan MNEK.
Entretantu, sorumutu ne’e, akompaña husi Vise Primeiru-Ministru no Ministru Koordenadór Assuntus Ekonómikus no Ministru Turizmu no Ambiente, Francisco Kalbuadi Lay, Ministru Agrikultura no Pekas, Floresta no Pekuária, Marcos da Cruz, Sekretáriu Estadu Komunikasaun Sosiál, Expedito Dias Ximenes, Xefe Estadu Maiór Jenerál Forsas Armadas, Tenente Jenerál Falur Rate Laek, Tenente Jenerál Reformadu, Lere Anan Timur no seluk tan.
Jornalista:Javelino Da Silva
