DILI Post (Covalima).com – Prezidente Repúblika (PR) José Ramos Horta ho Primeiru Minsitru (PM) Kay Rala Xanana Gusmão liu husi Sosiedade Sívil Prezidênsia Repúblika Oferese Prezente natál ba Oan kiak sira hela iha Sentru Esperansa ba Feto iha Salele.
Hafoin de entrega Prezente ne’e Reprezentante Prezidênsia Repúblika Assesór Prinsipál Quintiliano Moniz Carvalho informa konaba vizita ne’e parte husi PR no PM ‘Natal ho Povu’,objetivu atu garante katak,grupu vunerável ka Oan kiak sira, moras no Prizioneriu sira sente katak iha époka Natal.
“Ami mai iha ne’e hatutan deit nai Prezidente da Repúblika no ita Primeiru Ministru sira nain rua nia domin ne’ebé halo iha tempu natál,” Natal ho Povu”laos tanba sasán ne’e mak ami hakat mai. Maibé, lori sira nain rua nia naran mai hasoru ita boot sira, ne’e domin ida mai direta husi ita nia lider boot nain rua,” hateten Reprezentante Prezidênsia Repúblika ne’e ba Jornalista Díli Post iha foin lalais ne’e iha Uma mahon Salele, Postu Tilomar.
Programa ne’e responsabilidade husi gabinete Prezidênsia Repúblika no gabinete Vise PM no apoiu mós husi Ministériu Komersiu industria no setór Privadu sira.
“Ami mai la’os iha ne’e de’it,mais hakat mos ba fatin seluk, Orfaun sira, ba uma mahon sira, ba ema dadur sira, ba ema moras sira iha Ospitál, hodi komemora ita nia festa natal. Tanba, ida ida ne’e mak ami hakat mai iha ne’e atu entrega deit sasan hirak ne’e ba ita boot sira hodi festeza natal ho povu, hodi festeza no hein simu ita nia kosok Oan Nai Jesus,ne’ebé labele haree ba sasán nia kuantidade barak ka ituan,maibé haree ba domin husi Nai Prezidente da Repúblika no ita nia nai Primeiru Ministru Domin ne’ebé boot ba ita sira mezmu imi dook husi Salele maibé ita boot sira nia naran uma mahon ida ne’e sempre iha Nai Prezidente ho Nai Primeiru Ministru nia Fuan, ” haktuir Assesór Prinsipál Quintiliano.
Iha fatin hanesan Madre Maria Olinda SSPS hato’o agradese ba PR nuudár Aman ba nasaun,ne’ebé la husik leet nia Oan sira moris iha uma Mahon ida ne’e mesak.
” Kada tinan ami sempre hetan apoiu,no mós iha tinan ida ne’e ami mós simu apoiu ida ne’e, ami la mesak maibé nuudar Aman ba nasaun sempre tau matan mai ami ,sempre hanoin ami, tau matan mai atu labele mate hamlaha no ami la menus hatais nuudár Oan Sira Seluk mós,ne’ebé Obrigada ba Nai Prezidente Repúblika ho Nai Primeiru Ministru ho Fuan Prontidaun,fuan ne’ebé sempre ajuda ami iha fatin ida ne’e,”Konklui nia.
Jornalista : Julia Lurdes do Rego
