DiliPost.com-Prezidente Repúblika (PR) José Ramos Horta prefere Festival Kulturál Rabilau bele sai Festival bo’ot iha Timor-Leste (TL).
“Rabilau bele sai Festival bo’ot iha TL kada tinan ema atu ba atus no rihun ba rihun bele mai, desde mai buat ne’ebé ha’u hatete labele dada grupu modernu sira maka mai toka fali, 100% tenke toka ho grupu tradisionál hanesan dansa koremetan no dansa tradisionál sira seluk ne’ebé iha” hateten PR iha Postu Administrativu Maubisse, Munisípiu Ainaro,Kuarta feira ne’e.
Xefe Estadu haktuir tenke rekoñese ida-ne’e, inisiativa ne’e hahú ona tinan kotuk xefe suku Maubisse sira maka hahú ho sira nia rekursu rasik.
“Tinan kotuk ha’u mai , iha momentu ne’ebá sosa karau ida ba sira, no fó apoiu balun tán no ko’alia ho Primeiru Ministru no Vise-Primeiru ministru, nune’e envolve governu hodi hadi’a di’ak liu iha futuru” tenik Xefe Estadu.
Aliende ne’e PR fo hanoin presiza Governu nia envolvimentu no Ministériu responsável sira liu-liu Ministériu Agrikultura, hodi promove kultura TL, labele lori fali kultura modernu.
“Reprezenta tradisionál duni, la’ós lori fali grupu modernu sira di’ak liu halo de’it iha Dili. Tanba, Maubisse ne’e sai hanesan ilha kulturál ba Munisípiu hotu, hodi halo buat ne’ebé orijinál no 100% tradisionál kulturál. Rabilau maka sai festival kulturál timor nian iha futuru” hakotu PR Horta.
Jornalista : Octaviana da Costa
