DILI Post(Aileu)-Prezidénsia Repúblika liuhosi Servisu Sosiedade Sivíl no Asuntu Sosiál ne’ebe Lidera husi Asesór Quintiliano Moniz to’o direita iha Aldeia Manubata, Suku Hoholau, Postu Administrativu Aileu Vila hodi haree no lori kedas labarik minoridade nain (4) ne’ebe abandona husi inan no aman rasik.
Asesór Servisu Sosiedade Sivíl no Asuntu Sosiál Prezidénsia Repúblika, Quintiliano Moniz informa , bazeia ba públikasaun iha mídia sosial ne’ebé hetan husi Prezidente Repúblika Jose Ramos Horta, no Prezidente orienta kedas ekipa atu mai lori ki’ik-oan na’in haat ne’e mai Dili atu nune’e bele kria kondisaun ba sira liu-liu haruka sira ba eskola no hetan kuidadu.
Xefe Aldeia Manubata, António Lelo hateten katak labarik sira-nia aman abandona ka husik sira kuaze tinan ualu ona no sir-nia inan husik sira kuaze tinan ida resin ona. Durante ne’e família no viziñu sira mak tau matan hela ba sira na’in haat mak hanesan Yohanes da Costa Araujo, ho idade 13, Dircia Maria da Conceição, idade 11, Octaviano da Costa Araujo, idade 9, no Jesulio da Conceição idade tinan 2.
Ekipa Prezidénsia Repúblika liuhosi Servisu Sosiedade Sivíl no Asuntu Sosiál lori ona alin mane na’in tolu ne’e mai Dili, maibé alin feto Dircia mak sei hela ho profesora ida iha aldeia refere.
Enkuantu iha Publikasaun Facebook Privadi Prezidénte Repúblika nian “José Ramos Horta ” Espresa,Oan Kiak Na’in Tolu ne’e oras ne’e Dadaun iha ona Rezidensia Xefe Estadu nian.
“Alin kiak nain Tolu husi Aileu, familia abandona, horas ne’e iha hau nia uma, to’o hetan solução diak ba sira.“Liafuan ne’e sita iha Facebook José Ramos Horta nian
Jornalista: Javelino Da Silva
