DILI Post-Prezidente Repúblika Demokrátika Timor-Leste, José Ramos-Horta, hato’o parabéns ba Keir Starmer ne’ebe Eleito N’udar Primeiru-Ministru Reinu Unidu nian.
Iha eleisaun ne’ebé hala’o iha loron 04 fulan-jullu 2024, Prezidente Repúblika Demokrátika Timor-Leste, José Ramos-Horta, haruka mensajen parabéns ida, ne’ebe Lori povu Timor-Leste nia naran, hodi hato’o parabéns sinseru liu ba vitória istórika Partidu Traballista nian iha lideransa Keir Starmer nian, destaka katak ida ne’e marka era foun transformasaun nian, nakonu ho esperansa no otimizmu ba Reinu Unidu.
Prezidente Ramos-Horta hato’o espetativa kolaborasaun pozitivu no konstrutivu ho Governu ne’ebé foin eleitu, ho objetivu atu hakle’an relasaun entre Timor-Leste no Reinu Unidu no hametin parseria foun iha área hotu-hotu, hodi promove kreximentu mútuál no prosperidade.
Aleinde ne’e, subliña “importánsia hosi abertura ne’ebé hein kleur ona hosi Embaixada Reinu Unidu nian iha Díli, Timor-Leste, hanesan pasu signifikativu ida hodi reforsa kooperasaun diplomátiku no ekonómiku entre nasaun rua”. Asaun ida ne’e sei permite atu maximiza oportunidade sira ne’ebé mosu husi Timor-Leste nia adezaun foin lalais ne’e ba Organizasaun Mundiál Komérsiu (OMK) no adezaun iminente ba Asosiasaun Nasaun Sudeste Aziátiku (ASEAN) iha tinan 2025.
Prezidente mós “rekoñese prezensa signifikativu hosi diáspora timoroan sira iha Reinu Unidu, ne’ebé nia remesa sira reprezenta fonte rendimentu boot daruak ba Timor-Leste, hafoin reseita sira hosi petróleu no gás, no hatudu agradesimentu ba ospitalidade jeneroza hosi Reinu Unidu no nia ema sira”.
Iha momentu krítiku ba asuntu mundiál, Prezidente Ramos-Horta subliña importánsia hosi lideransa foun Reinu Unidu nian hodi promove pás no estabilidade internasionál. Nia reafirma nia vontade atu kolabora besik ho Primeiru-Ministru Keir Starmer no nia Governu hodi kontinua promove valór sira ne’ebé fahe malu kona-ba liberdade, demokrasia, no estadu direitu iha rejiaun no mundu.
Prezidente José Ramos-Horta hakotu hodi hato’o nia dezeju di’ak ba mandatu Keir Starmer nu’udar Primeiru-Ministru foun Reinu Unidu nian.
Jornalista: Javelino Da Silva
