ATAURO (DILI Post)-Prezidente Repúblika, José Ramos-Horta kontinua fó apoiu sosiál ba kmunidade vulnerável inklui oferese materiÁl konstrusaun uma nian ba Familia Vulnéravel iha bairro Akrema, Aldeia Uaru-ana, Suku Biqueli, Munisípiu Ataúro, foin lalais ne’e.
Alende ne’e, PR mos apoiu Família Fernando Belo hetan apoiu materiál konstrusaun husi Xefe Estadu , tamba sidadaun Fernando ho idade 60-resin ne’e husu tulun liu husi Assesór SSAS-PR atu Prezidente Repúblika Jose Ramos-Horta bele hadia nia uma, ne’ebé, ho kondisaun grave, liu-liu iha tempu udan. Tamba iha família ne’e, iha mos bebe ho idade menus husi tinan tolu. Hafoin hato’o ba Xefe Estadu, hetan kedas aprovasaun ba apoiu ne’ebé husu.
Tuir Assesór nu’udár servisu Sosiedade Sivíl no Assuntu Sosiál Prezidénsia Repúblika ( SSAS-PR), Quintiliano Moníz Carvalho, haktuir,apoiu Aihan Nesesidade Bazika Ba Familia Vulnéravel ne’e Bazeia Orientasaun husi Xefi Estado José Ramos-Horta.
“Ohin ita oferese tuir orientasaun no aprovasaun husi Prezidente Repúblika, J. Ramos-Horta hodi oferese materiál konstrusaun ba família ida husi Apa Fernando Belo no oferese mos nessidade bázika ba família vulnerável uma-kain 30 inklui ropa ba labarik no Jacket salva vida iha tasi-laran ba peskadór sira,” Dehan Nia hafoin distribui Sasan sesta Foin lalais ne’e.
Reprezentante autoriedade lokál Suku Biqueli, Nadab Correia, agradese ba tulun Xefe Estadu Horta tambá bele tulun nia populasaun.
“Komunidade ne’e infrenta duni uma-at, terus liu bainhira tempu udan. Nune’e prezensa husi Prezidénsia Repúblika nian, ami kontente no agradese ho tulun ne’ebé iha ba ami nia komunidade”. Nadab Correia.
Bairro Akrema totál populasaun 162 no lokaliza iha area potensiadu ba turízmu maibé area ida izoladu, la assesu ba bee-moos, eletrisidade inklui telekomunikasaun.
Entretantu, ajudu ne’ebé Prezidente Repúblika oferese liuhusi Servisu SSAS-PR mak, ekipamentu konstrusaun uma ba família fulnerável mak hanesan simenti 50, Kalém 80, Ai ba halo uma hamutuk 30, Raihenek iha kamioneta ida, inklui oferese ai-han báziku hanesan fós no mina ba tein ba uma-kain vulnerável hamutuk 30 no ropa ba labarik no ‘’Jacket salva vida’’ iha tasi nian, hamutuk 50 ba peskadór sira.
Jornalista: Javelino Da Silva
